20-24 თებერვალს ბარსელონაში გაერთიანებული ქალაქებისა და ადგილობრივ ხელისუფლებათა მსოფლიო ორგანიზაციის (UCLG) სამუშაო შეხვედრა გაიმართა, რომელშიც საქართველოს ადგილობრივ თვითმმართველობათა ეროვნული ასოციაციის (NALAG) მიერ ევროპის მუნიციპალიტეტთა და რეგიონთა საბჭოში (CEMR) წარდგენილი წევრი, CEMR-ის ვიცე- პრეზიდენტი და თბილისის საკრებულოს წარმომადგენელი - ნინო რუხაძე იღებდა მონაწილეობას.

ღონისძიების ფარგლებში ორგანიზაციის პრეზიდენტების სხდომა გაიმართა, რომელზეც CEMR-ის ვიცე- პრეზიდენტმა დამსწრე საზოგადოებას სიტყვით მიმართა.

ნინო რუხაძემ UCLG -ის ევრაზიის სექციაში საქართველოს ოკუპირებული ტერიტორიების წევრობის საკითხზე ისაუბრა და გაერთიანებული ქალაქებისა და ადგილობრივ ხელისუფლებათა მსოფლიო ორგანიზაციის პრეზიდენტსა და კოლეგებს მოუწოდა მიიღონ ყველა საჭირო ზომა, რათა საქართველოს, მოლდოვასა და უკრაინის ტერიტორიები ჩამოერთვას UCLG-ის ევრაზიის სექციას.

ნინო რუხაძის განცხადებით,  სამთავრობათაშორისო პოლიტიკურ და სასამართლო ფორუმებზე, რუსეთს ყველა პროცესი წაგებული აქვს. ამიტომ ახლა მისი სტრატეგია საქართველოს, მოლდოვასა და უკრაინის ტერიტორიების მიმართ მუნიციპალიტეტების საერთაშორისო ორგანიზაციებზე ყურადღების გადატანა და საერთაშორისო მუნიციპალური ქსელების დონეზე უკანონო პოლიტიკის გაგრძელებაა.

„რუსეთის სტრატეგია ნათლად გამოიკვეთა იმ ფაქტით, რომ ქალაქები - სოხუმი, ტირასპოლი. სევასტოპოლი და დონეცკი. რომლებიც საქართველოს, მოლდოვასა და უკრაინის ტერიტორიების განუყოფელ ნაწილს წარმოადგენს, საოკუპაციო რეჟიმების მიერ შეყვანილია UCLG -ის ევრაზიის სექციაში. თუ UCLG არ რეაგირებს ამ უკიდურესად საგანგაშო ფაქტზე, რუსეთი ამას სპეკულაციისთვის გამოიყენებს, თითქოს UCLG საქართველოს მოლდოვასა და უკრაინის ტერიტორიებზე საოკუპაციო რეჟიმებს აღიარებს. აღნიშნული  კი,  ქვეყნების სუვერენიტეტისა და ტერიტორიული მთლიანობის აშკარა დარღვევას წარმოადგენს, რაც სრულად ეწინააღმდეგება გაეროს წესდებას, რეზოლუციებს და ასევე, UCLG-ის კონსტიტუციის მე-5 მუხლს“, - განაცხადა ნინო რუხაძემ.

CEMR-ის ვიცე- პრეზიდენტმა, ასევე ხაზგასმით აღნიშნა, რომ სუვერენული თანასწორობა და ტერიტორიული მთლიანობა საერთაშორისო სამართლის ძირითად პრინციპებს წარმოადგენს.

,, დღეს მე გესაუბრებით სამი ერის - საქართველოს, მოლდოვასა და უკრაინის სახელით, რომლებიც გახდნენ ამ ფუნდამენტური პრინციპების უხეშად, უკანონოდ და დაუჯერებლად უსამართლოდ დარღვევის მსხვერპლნი. ტერიტორიები, რომლებიც საერთაშორისოდ აღიარებული სახელმწიფო საზღვრების მიხედვით საქართველოს, მოლდოვასა და უკრაინის განუყოფელ ნაწილს წარმოადგენს, უკანონოდაა ოკუპირებული რუსეთის ფედერაციის მიერ. არსებობს გაეროს, ევროპის საბჭოს, ევროკავშირის და უამრავი სხვა ავტორიტეტული საერთაშორისო ორგანიზაციის რეზოლუციები, რომლებიც აღიარებენ საქართველოს, მოლდოვასა და უკრაინის ტერიტორიულ მთლიანობასა და  საერთაშორისოდ აღიარებული საზღვრების ხელშეუხებლობას, ასევე მოითხოვენ რუსეთის მიერ საქართველოს, მოლდოვასა და უკრაინის განუყოფელი ტერიტორიების უკანონო ოკუპაციის დაუყოვნებლივ შეწყვეტას“, - განაცხადა ნინო რუხაძემ.

გაერთიანებული ქალაქებისა და ადგილობრივ ხელისუფლებათა მსოფლიო ორგანიზაციის შეხვედრაზე, საქართველოს წარმომადგენელმა უკრაინის მხარდამჭერ დეკლარაციასაც დაუჭირა მხარი, რომელიც უკრაინის წინააღმდეგ რუსეთის ომის წლისთავთან დაკავშირებით, UCLG -ის ევროპული სექციის მიერ შემუშავდა.