სტრასბურგში მიმდინარე ევროპის საბჭოს ადგილობრივ და რეგიონულ ხელისუფლებათა კონგრესის 42-ე პლენარული სესიის ფარგლებში, საქართველოს დელეგაცია უკრაინის დელეგაციას შეხვდა.
შეხვედრაზე, რომელშიც ქართული მხრიდან, თბილისის საკრებულოს თავმჯდომარე – გიორგი ტყემალაძე, დედაქალაქის წარმომადგენლობითი ორგანოს წევრები – ოთარ გრიგოლია და ლევან ჟორჟოლინი, ასევე კონგრესის ადგილობრივი ხელისუფლების პალატის წარმომადგენელი – ნინო ქავთარაძე, უკრაინის მხრიდან კი, მიკოლაევის ოლქის რეგიონული საბჭოს თავმჯდომარე – ჰანა ზამაზიეიევა, რივნეს ოლქის რეგიონული საბჭოს წევრი – კრივკო ბოჰათირჩუკი, ვოლინის ოლქის რეგიონული საბჭოს წევრი – იულია ვუსენკო, აგრეთვე, მატეივეცკის სოფლის საბჭოს წევრი – ტეტიანა ჰოიანი და ხარკოვის ოლქის რეგიონული საბჭოს თავმჯდომარე -ტეტიანა იეჰოროვა-ლუჩენკო იყვნენ ჩართულნი, უკრაინაში არსებული ვითარება განიხილეს.
ქართულმა მხარემ უკრაინულ დელეგაციას კიდევ ერთხელ დაუდასტურა საქართველოს მხარდაჭერა და სოლიდარობა, როგორც ცენტრალური, ასევე ადგილობრივი ხელისუფლების და საერთაშორისო დონეზე.
გიორგი ტყემალაძის განცხადებით, მათ უკრაინული დელეგაციის წევრებს ყველა იმ ღონისძიების შესახებ მიაწოდეს ინფორმაცია, რომლებიც საქართველოში მყოფი უკრაინის მოქალაქეების დასახმარებლად მიმდინარეობს.
შეხვედრაზე, ასევე განიხილეს ევროსაბჭოს ადგილობრივ და რეგიონულ ხელისუფლებათა კონგრესის მიერ უკრაინის უფრო ქმედითი და აქტიური მხარდაჭერის შესაძლებლობები.
როგორც თბილისის საკრებულოს თავმჯდომარემ აღნიშნა, არსებობს მოსაზრება, შეიქმნას ახალი პლატფორმა, რომ უკრაინისთვის ჰუმანიტარული დახმარების გაწევა მეტად მიზნობრივად განხორციელდეს.