ქართული დელეგაციის ახალმა შემადგენლობამ ევროპის საბჭოს კონგრესის მონიტორინგის კომიტეტის სხდომაში მიიღო მონაწილეობა
მიმდინარე თვის 14 თებერვალს სტრასბურგში გამართულ შეხვედრაზე, სხვა საკითხებთან ერთად, საქართველოში 2017 წლის 21 ოქტომბერს გამართული ადგილობრივი თვითმმართველობის არჩევნების საკითხი იყო წარმოდგენილი.
დელეგაციას, რომლის შემადგენლობაშიც რეგიონთა პალატის სრული და სათადარიგო წევრები, თბილისის მუნიციპალიტეტის საკრებულოს დეპუტატები – თამარ ტალიაშვილი და ბექა დავითულიანი შედიოდნენ, ადგილობრივი ხელისუფლების პალატის სრული წევრი, რუსთავის საკრებულოს წარმომადგენელი – ნინო ქავთარაძე ხელმძღვანელობდა.
საქართველოს შესახებ საინფორმაციო ხასიათის მოხსენებით, კომიტეტის წევრების წინაშე დიდი ბრიტანეთის წარმომადგენელი, ევროპის საბჭოს რეგიონთა პალატის წევრი- სტიუარტ დიქსონი წარსდგა.
მანვე ქვეყანაში ჩატარებული თვითმმართველობის არჩევნები დადებითად შეაფასა და ქართულ მხარეს რეკომენდაციების სახით წინადადებები წარუდგინა.
როგორც დიქსონმა აღნიშნა, არჩევნების ორგანიზება და ჩატარება ადამიანის უფლებებისა და კანონიერების ევროპული სტანდარტების დაცვით განხორციელდა.
ადგილობრივ თვითმმართველობათა ეროვნული ასოციაციის ვიცე-პრეზიდენტმა-თამარ ტალიაშვილმა კომიტეტის სხდომის მონაწილეებს სიტყვით მიმართა და საქართველოში ჩატარებული არჩევნების დადებითად შეფასებისა და ქვეყანაში დემოკრატიული პროცესების მხარდაჭერისთვის მადლობა გადაუხადა.
ქართული დელეგაციის ახალი შემადგენლობის მეორე ვიზიტი სტრასბურგში მარტის ბოლოს იგეგმება.
ადგილობრივი ხელისუფლებისა და რეგიონთა პალატების წარმომადგენლები ევროპის საბჭოს ადგილობრივი თვითმმართველობის და რეგიონთა კონგრესის სესიაში მიიღებენ მონაწილეობას.
საქართველომ ევროპის საბჭოს ადგილობრივი და რეგიონული ხელისუფლების კონგრესში, ადგილობრივ თვითმმართველობათა ეროვნული ასოციაციის პრეზიდენტის კახა კალაძის ხელმძღვანელობით, დელეგაციის ახალი შემადგენლობა მიმდინარე წლის თებერვლის დასაწყისში წარადგინა.