29 თებერვალს, მცხეთა-მთიანეთის სამხარეო ადმინისტრაციაში, ევროკავშირის პროექტის ფარგლებში, საქართველოს ადგილობრივ თვითმართველობის ეროვნული ასოციაციის (NALAG) ინიცირებითა და LDA-georgia-ს (ადგილობრივი დემოკრატიის სააგენტო – საქართველოს) მხარდაჭერით, გაიმართა რეგიონალური შეხვედრა თემაზე  „სამოქალაქო საზოგადოება ადგილობრივი დემოკრატიისთვის“. 

შეხვედრას ესწრებოდნენ საქართველოს მთავრობის  რწმუნებული  მცხეთა-მთიანეთის რეგიონში  – ნუგზარ ყიფიანი, ევროდელეგაციის წარმომადგენელი, სამოქალაქო საზოგადოების და დემოკრატიზაციის პროგრამის მენეჯერი – დომინიკა სკუბიდა,  მცხეთა-მთიანეთის რეგიონის ადგილობრივი თვითმმართველობის წარმომადგენლები, რეგიონის არასამთავრობო სექტორი და  მედია.

შეხვედრაზე, ევროდელეგაციის წარმომადგენელმა დომინიკა სკუბიდამ მხარდაჭერა გამოხატა საქართველოში ქმედითუნარიანი თვითმმართველობის ჩამოყალიბებისთვის მიმდინარე პროცესებში. დადებითად შეაფასა აღნიშნული საკითხის აქტუალიზაციისთვის გადადგმული ნაბიჯები;

ღონისძიებაზე განიხილეს სამოქალაქო საზოგადოების როლი ადგილობრივი დემოკრატიის განვითარების საქმეში; მოქალაქეთა მონაწილეობის ეფექტური მექანიზმები; ადგილობრივი დემოკრატიის ევროპული მოდელები და სხვა მნიშვნელოვანი თემები. 

პროექტი, რომლის ფარგლებშიც გაიმართა შეხვედრა და რომელსაც „საქართველოს ადგილობრივ თვითმმართველობათა ეროვნული ასოციაცია“, პარტნიორი ორგანიზაციების მხარდაჭერით ახორციელებს, ემსახურება ადგილობრივი თვითმმართველობის რეფორმის და დეცენტრალიზაციის პროცესის მხარდაჭერას, კერძოდ კი პროექტის ღონისძიებები დამყარებულია საფუძვლიან მოსაზრებაზე, რომ არც ერთი მთავრობა არ იტყვის უარს პროცესების ცენტრალიზებულად მართვაზე, რომ არა კარგად ორგანიზებული, კვალიფიციური და აქტიური მოთხოვნა ქვემოდან.

სწორედ იმისთვის, რომ ადგილობრივ სათემო ორგანიზაციებს შეძლებოდათ შეესრულებინათ თავიანთ ტერიტორიულ ერთეულში არსებული მნიშვნელოვანი საკითხებისა თუ პრობლემების კვალიფიციური ადვოკატირება, „ადგილობრივი თვითმმართველობის ეროვნულმა ასოციაციამ“, პროექტის ფარგლებში, მთელი ქვეყნის მაშტაბით, ჩაატარა ტრენინგები 62 მუნიციპალიტეტის 1200-მდე სოფლის ლიდერისთვის. ტრენინგების პროგრამა საზოგადოების მოქალაქეობრივი ცნობიერების ამაღლების პარალელურად, ადგილობრივი თვითმმართველობის კანონის გაცნობას, ინფორმაციის საჯაროობის და მისი გამოთხოვნის წესის, პრიორიტეტული პრობლემების გამოვლენის და მათზე კონცენტრირების უნარ-ჩვევების შეძენას ითვალისწინებდა. „დღეს გამართული შეხვედრა არის კარგი მაგალითი იმისა თუ როგორ ცდილობენ ადგილობრივი ხელისუფლება და სამოქალაქო საზოგადოება დიალოგის გზით წარმოაჩინონ ადგილობრივი პრობლემები და ერთად იმუშაონ მათი გადაჭრისთვის. ურთიერთობის ასეთი ფორმა უნდა შეფასდეს, როგორც კარგი მმართველობითი პრაქტიკა და ჩვენ ვეცდებით დიალოგის ეს ფორმა სხვა რეგიონებშიც დაინერგოს“ – აცხადებს საქართველოს ადგილობრივ თვითმმართველობათა ეროვნული ასოციაციის დირექტორი დავით მელუა.