პოლიტიკური კოალიცია „ქართული ოცნების“ ადგილობრივმა აქტივისტებმა 2013 წლის 10 იანვარს თეთრიწყაროს ადმინისტრაციული შენობის ბლოკირება მოახდინეს. მუშაობის საშუალება არ მიეცა მუნიციპალიტეტის თანამშრომლებს. ამის შემდგომ აქტივისტებმა შენობის შუშები ჩაამსხვრიეს და მასში შეღწევა სცადეს. ამჯერად ადგილობრივმა პოლიციამ მოახდინა სწრაფი რეაგირება ფაქტთან დაკავშირებით და აქტივისტები იძულებულნი გახდნენ დაეტოვებინათ ადმინისტრაციული შენობა. მუნიციპალიტეტის თანამშრომლებს შენობაში შესვლისა და თავიანთი მოვალეობების განხორციელების საშუალება მიეცათ.
საქართველოს ადგილობრივ თვითმმართველობათა ეროვნული ასოციაცია მადლობას უხდის საქართველოს შინაგან საქმეთა სამინისტროს და პოლიციის იმ თანამშრომლებს, ვინც დაიცვა კანონი თეთრიწყაროს მუნიციპალიტეტში და საშუალება მისცა ადგილობრივი თვითმმართველობის ერთეულს განეხორციელებინა თავისი კონსტიტუციური მანდატი. ჩვენ ასევე მივესალმებით საქართველოს შინაგან საქმეთა მინისტრის განცხადებას იმის თაობაზე, რომ კანონის შესაბამისად დაისჯებიან ისინი, ვინც კოორდინირებას უწევდა თეთრიწყაროს მუნიციპალიტეტზე თავდასხმას. ასევე პოლიცია აღარ შეეგუება ადგილობრივი თვითმმართველობის ერთეულების ბლოკირების ფაქტებს და ოფიციალურ პირთა წინააღმდეგ მიმართულ არაკანონიერ ქმედებებს. ჩვენ მივიჩნევთ ამ განცხადებას, როგორც საქართველოში პოლიტიკურ აქტორთა შორის კოაბიტაციის კარგ მოდელს.