საქართველოს ადგილობრივ თვითმმართველობათა ეროვნული ასოციაციის (NALAG) აღმასრულებელი დირექტორის მოადგილემ – ნათია ღვინაშვილმა, საქართველოს მთავრობის ადმინისტრაციაში გამართულ სამუშაო შეხვედრაში მიიღო მონაწილეობა, რომელიც შეზღუდული შესაძლებლობის მქონე პირთა შესახებ, სტატისტიკური მონაცემების წარმოების და მისაწვდომობის გაუმჯობესების საკითხებზე მსჯელობას დაეთმო.
საქართველოს პრემიერ-მინისტრის მრჩევლის ადამიანის უფლებათა დაცვის საკითხებში – ნიკო თათულაშვილის ხელმძღვანელობით გამართულ შეხვედრაზე, ძირითადი აქცენტები, აღნიშნული მიმართულებით, უწყებებს შორის კოორდინაციის გაძლიერებისა და ასევე, მუნიციპალიტეტების მხრიდან ინფორმაციის შეგროვებისა და დამუშავების პროცესზე გაკეთდა.
ჰიბრიდულ რეჟიმში გამართული სამუშაო შეხვედრა, რომელსაც საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილე – თამარ ბარკალაია, საქართველოს რეგიონული განვითარებისა და ინფრასტრუქტურის მინისტრის მოადგილე – მზია გიორგობიანი, საქართველოს სტატისტიკის ეროვნული სამსახურის აღმასრულებელი დირექტორი – გოგიტა თოდრაძე და საქართველოს მთავრობის ადმინისტრაციის რეგიონებთან ურთიერთობის დეპარტამენტის უფროსის მოადგილე – მერაბ გამყრელიძე ესწრებოდნენ, დისკუსიის ფორმატში წარიმართა.
შეხვედრის მონაწილეებმა, როგორც მოკლევადიანი, ისე გრძელვადიანი საჭიროებები გამოკვეთეს და შემდგომი ეტაპებისთვის კოორდინირებული მუშაობის გაძლიერების აუცილებლობაზე შეთანხმდნენ.