საქართველოს ადგილობრივ თვითმმართველობათა ეროვნული ასოციაციის მედია ქსელი გენდერული ძალადობის წინააღმდეგ 16 დღიანი კამპანიის ფარგლებში აქტიურ რეჟიმში განაგრძობს მუშაობას.
როგორც ორგანიზაციის აღმასრულებელი დირექტორის მოადგილემ, CEMR-ში ეროვნულმა კოორდინატორმა და ექსპერტმა, ასევე პროექტის – „გენდერული პოლიტიკის ლოკალიზაცია“ კოორდინატორმა – ნათია ღვინაშვილმა განაცხადა, აღნიშნული პლატფორმა მუნიციპალიტეტებს შორის კარგი მაგალითებისა და პრაქტიკის გაზიარების მიზნით შეიქმნა და თვითმმართველ ერთეულებში მიმდინარე თემატური ღონისძიებების დიდი ნაწილი, სწორედ ათეა-სა და გაეროს ქალთა ორგანიზაციის მიერ ერთობლივად შემუშავებული განახლებული გზამკვლევის დახმარებით ხორციელდება.
მისივე განცხადებით, წინა წლების პრაქტიკამ აჩვენა, რომ ძალადობის წინააღმდეგ გავრცელებული ინფორმაციული ხასიათის აქტივობები ხელს უწყობს მოსახლეობის ცნობიერების ამაღლებას, რაშიც უდიდესი როლი აკისრიათ თვითმმართველობებს, ვინაიდან ისინი წარმოადგენენ ხალხთან ყველაზე ახლოს მდგომ სამთავრობო რგოლს.
,, პანდემიის მიუხედავად, 16 დღიან კამპანიას წელსაც შეუერთდნენ მუნიციპალიტეტები. სოციალურ ქსელში, ქვეყნდება სხვადასხვა ნარატიული და ვიზუალური ინფორმაცია, ხელმძღვანელი პირების მიმართვები და ვიდეორგოლები. ძალადობის მსხვერპლთა დაცვისა და ქალთა ეკონომიკური გაძლიერების მიმართულებაზე სამსჯელოდ, სამიზნე აუდიტორიასთან შეხვედრებს გეგმავენ თბილისის გამგეობებშიც.
აქვე, მინდა აღვნიშნო, რომ გაეროს ქალთა ორგანიზაციის მხარდაჭერით მომზადებულ თემატურ პოსტერებს სხვადასხვა რეგიონებში მცხოვრები მოქალაქეებიც აზიარებენ, შესაბამისად თამამად შეიძლება ითქვას, რომ ბოლო წლებში აღნიშნული მიმართულებით განხორციელებულმა ღონისძიებებმა, მნიშვნელოვნად შეცვალა მოსახლეობის დამოკიდებულება“, – განაცხადა ნათია ღვინაშვილმა.
ათეა-ს წარმომადგენელმა ასოციაციის მიერ ქალთა მიმართ ძალადობის 16 დღიანი კამპანიის ფარგლებში განსახორციელებელ აქტივობებზეც ისაუბრა და ათეა-სა და გაეროს ქალთა ორგანიზაციის მიერ 6 დეკემბერს დაგეგმილ საჯარო დისკუსიაზე გაამახვილა ყურადღება.
,,პანდემიის ფონზე, მიმდინარე კვირეულის ღონისძიებების დაგეგმვისას, ვეცადეთ მაქსიმალურად გამოგვეყენებინა ყველა პლატფორმა და ქალთა მიმართ და ოჯახში ძალადობის საკითხებზე ცნობიერების ამაღლების მიზნით, დავგეგმეთ საჯარო ღონისძიება, სადაც დარგის ექსპერტები თვითმმართველი ერთეულების როლზე, არსებულ პროგრესსა და გამოწვევებზე, ასევე სახელმწიფო სერვისებზე და მოქალაქეებისთვის სხვა საინტერესო და საჭირო თემებზე ისაუბრებენ.
შეხვედრა, რომელშიც ათეა-ს წევრი თვითმმართველი ერთეულების წარმომადგენლები იქნებიან ჩართულნი, დისკუსიის ფორმატს მოიცავს.
აღსანიშნავია, რომ ღონისძიება პირდაპირ ეთერის მეშვეობით იქნება წარმოდგენილი, რაც თემით დაინტერესებულ მოქალაქეებს შესაძლებლობას მისცემს უფრო სიღრმისეულად გაეცნონ, როგორც ადამიანის უფლებების შესახებ დეტალურ ინფორმაციას, ისე საკუთარი მუნიციპალიტეტების უფლებებსა თუ ვალდებულებებს აღნიშნულ საკითხზე“,- განაცხადა ნათია ღვინაშვილმა და განმარტა, რომ საჯარო დისკუსია 6 დეკემბერს 12:00 საათზე დაიწყება. Facebook Live -ის ნახვა კი, საქართველოს ადგილობრივ თვითმმართველობათა ეროვნული ასოციაციის (NALAG) გვერდზე იქნება შესაძლებელი.