სტრასბურგში ადგილობრივ და რეგიონულ ხელისუფლებათა კონგრესის 42-ე პლენარული სესია მიმდინარეობს, რომელშიც საქართველოს ადგილობრივ თვითმმართველობათა ეროვნული ასოციაციის (NALAG) მიერ, ევროპის საბჭოს კონგრესში წარდგენილი ქართული დელეგაცია იღებს მონაწილეობას.
სესიაზე შეკრებილ დელეგატებს სიტყვით მიმართა ევროპის საბჭოს გენერალურმა მდივანმა – მარია პეინჩინოვიჩ ბურიჩმა და აღნიშნა, რომ საქართველო არის კიდევ ერთი წევრი სახელმწიფო, რომელმაც რუსეთის აგრესია თავის თავზე გამოსცადა.
„უპირველეს ყოვლისა, სრულად ვუჭერთ მხარს საქართველოს სუვერენიტეტსა და ტერიტორიულ მთლიანობას საერთაშორისოდ აღიარებულ საზღვრებში. ეს ყველაზე ცოტაა რისი გაკეთებაც შეგვიძლია იმისთვის, რომ დავიცვათ ევროპა. აღნიშნული ანგარიშები, რომელიც 2 წელიწადში ერთხელ მუშავდება, არის ერთ-ერთი საშუალება, რომ მხარი დავუჭიროთ იქ მცხოვრებ ადამიანებს. სამწუხაროა, რომ აფხაზეთსა და ცხინვალის რეგიონებში არსებული მდგომარეობა მართლაც შემაშფოთებელია. კოვიდ-19-ით გამოწვეულმა მსოფლიო პანდემიამ შეაფერხა კონკრეტულ ღონისძიებებზე მუშაობა. ვფიქრობ, დღეს უკვე შესაძლებელია ღონისძიებების შემუშავება ადგილობრივ მოსახლეობაში ნდობის აღსადგენად. ეს არის საუკეთესო, რაც ჩვენ შეგვიძლია გავაკეთოთ კონფლიქტის გადაწყვეტის პროცესში,“- განაცხადა ევროპის საბჭოს გენერალურმა მდივანმა.
საქართველოს დელეგაციის სახელით ევროსაბჭოს გენერალურ მდივანს მადლობა გადაუხადა ათეას აღმასრულებელი საბჭოსა და თბილისის მუნიციპალიტეტის საკრებულოს წევრმა – ლევან ჟორჟოლიანმა, რომელმაც საქართველოს ოკუპირებულ რეგიონებში არსებულ ვითარებაზე გაამახვილა ყურადღება.
„ჩვენ გამოვხატავთ მადლიერებას საქართველოში არსებული კონფლიქტის შესახებ კონსოლიდირებული ანგარიშებისთვის, რომელშიც სათანადოდ არის ასახული ადგილზე უსაფრთხოებისა და ადამიანის უფლებების მხრივ არსებული მძიმე ვითარება, რუსეთის დესტრუქციული ქმედებები და მისი საოკუპაციო რეჟიმები. განსაკუთრებით მნიშვნელოვანია, რომ საერთაშორისო საზოგადოებამ შეინარჩუნოს სიფხიზლე და ხმა აიმაღლოს საქართველოს ოკუპირებულ რეგიონებში საგანგაშო მოვლენებზე,“ – აღნიშნა ლევან ჟორჟოლიანმა.
ათეას აღმასრულებელი საბჭოს წევრმა ევროსაბჭოს გენერალურ მდივანთან მიმართვისას აღნიშნა, რომ ევროსაბჭოს მიერ აუცილებელია კიდევ უფრო ქმედითი ნაბიჯების გადადგმა რუსეთის მიერ საქართველოს ოკუპირებულ რეგიონებში – აფხაზეთსა და ცხინვალში ვითარების გაუარესების თავიდან ასაცილებლად.