საერთაშორისო პროექტის „EcoYOU: ეკოლოგიურად სუფთა და მწვანე აზროვნება ეკომეგობრული ქცევისათვის“ ფარგლებში რუმინეთში გაიმართა მრავალფეროვანი ღონისძიებები, რომლებიც მიზნად ისახავდა გარემოსდაცვითი ცნობიერების ამაღლებასა და ტრანსნაციონალურ თანამშრომლობას.
საქართველოდან აქტივობებში ჩართულნი იყვნენ ადგილობრივ თვითმმართველობათა ეროვნული ასოციაციის (ა.თ.ე.ა.) წარმომადგენლები — ორგანიზაციის აღმასრულებელი დირექტორის მოადგილე, ტატიანა ბოკუჩავა და საერთაშორისო პროექტების განვითარების მენეჯერი, მარიამ ჯინჭარაძე, ასევე ქართველი სტუდენტები ელენე ტეტუნაშვილი და ელენე რაჭველიშვილი.
ღონისძიებების ფარგლებში გაიმართა პარტნიორი ორგანიზაციების შეხვედრა და თემატური აქტივობები, რომლებიც ორიენტირებული იყო გარემოსდაცვითი გამოწვევების გადაჭრის გზებზე, გამოცდილების გაზიარებასა და ეკომეგობრული ქცევის მნიშვნელობის ცნობიერების ამაღლებაზე.
მონაწილეებმა ჩაატარეს დასუფთავების აქცია ვადუს სანაპიროზე, რამაც ხელი შეუწყო მიკროპლასტმასის შემცირების მნიშვნელობის გაცნობიერებას. ასევე, გაიმართა საგანმანათლებლო-კულტურული ვიზიტი სოფელ იურილოვკაში, რათა გაეღრმავებინათ ცოდნა ბუნებრივი და კულტურული მემკვიდრეობის შენარჩუნების შესახებ.
ღონისძიებების ფარგლებში მონაწილეებმა მოინახულეს ქალაქ კონსტანცას ისტორიული ცენტრი, დღის მეორე ნახევარში კი, გაიმართა სპეციალური სესიები, პრეზენტაციები და განხილვები გარემოსდაცვითი პოლიტიკისა და ახალგაზრდების როლის შესახებ.
პროექტს, რომელიც შავი ზღვის აუზის პროგრამის (Interreg VI-B NEXT Black Sea Basin Programme) ფარგლებში ევროკავშირის თანადაფინანსებით ხორციელდება, საქართველოში კოორდინაციას უწევს ა.თ.ე.ა. პარტნიორ ორგანიზაციებთან ერთად მოლდოვიდან (ტრანსსასაზღვრო თანამშრომლობისა და ევროპასთან ინტეგრაციის სააგენტო), რუმინეთიდან (ასოციაცია პრო ნატურა, გალაცი; მარე ნოსტრუმ ეკოლოგი, კონსტანცა).
„EcoYOU“ მიზნად ისახავს გარემოსდაცვით ორგანიზაციებს, საგანმანათლებლო დაწესებულებებსა და ახალგაზრდებს შორის თანამშრომლობის გაძლიერებას, მიკროპლასტმასით დაბინძურების შემცირებასა და მდგრადი გარემოსდაცვითი პრაქტიკის დანერგვას შავი ზღვის აუზის ქვეყნებში.