საქართველოს ადგილობრივ თვითმმართველობათა ეროვნულმა ასოციაციამ (NALAG), ევროპის რეგიონთა და თვითმმართველობათა კომიტეტის აღმოსავლეთ პარტნიორობის კონფერენციაში – CORLEAP საქართველოს დელეგაციის ახალი შემადგენლობა დაამტკიცა.
ათეა-ს აღმასრულებელი საბჭოს გადაწყვეტილებით, CORLEAP-ში ძირითად შემადგენლობას, თბილისის მუნიციპალიტეტის საკრებულოს თავმჯდომარის მოადგილე – ზურაბ აბაშიძე, რუსთავის მუნიციპალიტეტის მერი – ნინო ლაცაბიძე და ზუგდიდის საკრებულოს წევრი – სანდრო სორდია წარმოადგენენ, სათადარიგო წევრებად კი, ბათუმისა და ქუთაისის მუნიციპალიტეტების მერები – არჩილ ჩიქოვანი და იოსებ ხახალეიშვილი, ასევე, ოზურგეთის მუნიციპალიტეტის საკრებულოს წევრი – მარიამ ჩხიკვიშვილი დასახელდნენ.
სხდომის მონაწილეთა გადაწყვეტილებით, აღნიშნულ დელეგაციას ზურაბ აბაშიძე უხელმძღვანელებს.
აღსანიშნავია, რომ საქართველოს ადგილობრივ თვითმმართველობათა ეროვნული ასოციაცია (NALAG) აღმოსავლეთ პარტნიორობის რეგიონთა და თვითმმართველობათა კონფერენციაში (CORLEAP) 2011 წელს გაწევრიანდა.
CORLEAP ევროკავშირის ერთადერთი პლატფორმაა, რომელიც იძლევა შესაძლებლობას განიხილოს ქალაქებისა და რეგიონების წვლილი აღმოსავლეთ პარტნიორობის განვითარებაში.
საქართველოს გარდა, CORLEAP -ის წევრ ქვეყნებს – უკრაინა, მოლდოვა, სომხეთი და აზერბაიჯანი წარმოადგენენ.