მტკიცებულებებზე დაფუძნებული ადვოკატირებისა და მდგრადი მომსახურების მიწოდების გზით, შეზღუდული შესაძლებლობის მქონე პირთა დამოუკიდებელი ცხოვრების ხელშეწყობის მიზნით, საქართველოს ადგილობრივ თვითმმართველობათა ეროვნული ასოციაციის (NALAG) ორგანიზებით, სამიზნე მუნიციპალიტეტების პირველი პირებისთვის სამუშაო შეხვედრა გაიმართა.
ორდღიანი ღონისძიება, რომელიც ათეა-ს აღმასრულებელმა დირექტორმა- დავით მელუამ, ამერიკის შეერთებული შტატების საერთაშორისო განვითარების სააგენტოს (USAID) დამოუკიდებელი ცხოვრების ორწლიანი პროგრამის ხელმძღვანელთან – ტეილერ გრინთან ერთად გახსნა, რამდენიმე სესიად დაიყო.
პირველი დღე, MAC Georgia-ს მიერ ჩატარებული საჭიროებათა კვლევისა და ასევე, საქართველოს იძულებით გადაადგილებულ პირთა, შრომის, ჯანმრთელობის და სოციალური დაცვის სამინისტროს მიერ შემუშავებული დოკუმენტის “შშმ პირთა დამოუკიდებლად ცხოვრების სტანდარტი” პროექტის პრეზენტაციებს დაეთმო, რის შემდეგაც დავით მელუამ შშმ პირების სოციალური დაცვის მუნიციპალური პოლიტიკის საჭიროებებზე ისაუბრა და დამსწრე საზოგადოებასთან ერთად, მათი აღმოფხვრის გზებზე იმსჯელა.
სამუშაო შეხვედრის მეორე დღეს კი, სესიის მონაწილეებმა, USAID-ის დამოუკიდებელი ცხოვრების ორწლიანი პროგრამის ფარგლებში, მუნიციპალიტეტებში დაფუძნებულ ცენტრებში არსებული მდგომარეობა მიმოიხილეს და შშმ პირებისთვის აუცილებელი სათემო სოციალური სერვისების ინტეგრირების ხელშეწყობის მიზნით, სამომავლო გეგმებზე იმსჯელეს.
შეხვედრა, რომელიც დისკუსიის ფორმატში მიმდინარეობდა, პროგრამის ხელმძღვანელმა, MAC Georgia-ს წარმომადგენელმა – ტეილერ გრინმა შეაფასა.
აღსანიშნავია, რომ სამუშაო შეხვედრას, რომელიც ბორჯომის მუნიციპალიტეტში, კოვიდ-რეგულაციების სრული დაცვით წარიმართა, USAID-ის პროგრამის პარტნიორი ორგანიზაციებისა და სამიზნე მუნიციპალიტეტების პირველ პირებთან ერთად, საქართველოს რეგიონული განვითარებისა და ინფრასტრუქტურის, ასევე, საქართველოს იძულებით გადაადგილებულ პირთა, შრომის, ჯანმრთელობის და სოციალური დაცვის სამინისტროებისა და კოალიცია დამოუკიდებელი ცხოვრებისთვის წარმომადგენლები ესწრებოდნენ.
ამერიკის შეერთებული შტატების საერთაშორისო განვითარების სააგენტოს (USAID) დამოუკიდებელი ცხოვრების ორწლიანი პროგრამა, ორგანიზაციების – კოალიცია დამოუკიდებელი ცხოვრებისათვის, ასევე მაკლეინის ასოციაცია ბავშვებისათვის (MAC) პარტნიორობითა და საქართველოს ადგილობრივ თვითმმართველობათა ეროვნული ასოციაციის (NALAG) თანამშრომლობით ხორციელდება.
პროექტის სამიზნე მუნიციპალიტეტებს – ქუთაისი, ოზურგეთი, ზუგდიდი, ბათუმი, თელავი და ლაგოდეხი წარმოადგენენ.