საქართველოს ადგილობრივ თვითმმართველობათა ეროვნული ასოციაციის (NALAG) აღმასრულებელი საბჭოსა და ევროპის საბჭოს კონგრესში ადგილობრივი ხელისუფლების პალატის წევრი, რუსთავის მუნიციპალიტეტის საკრებულოს თავმჯდომარის მოადგილე – ნინო ქავთარაძე, თურქეთში, 31 მარტს დაგეგმილ ადგილობრივ არჩევნებზე სადამკვირვებლო მისიით გაემგზავრა.
ევროსაბჭოს ადგილობრივ და რეგიონალურ ხელისუფლებათა კონგრესის დელეგაციას, რომელიც 20 ქვეყნიდან წარმოდგენილი 22 დამკვირვებლისგან შედგება, დიდი ბრიტანეთის წარმომადგენელი, აღნიშნული კონგრესის წევრი – ენდრიუ დავსონი ხელმძღვანელობს.
დელეგაციის წევრები 28-29 მარტს თურქეთის ხელისუფლების, დიპლომატიური კორპუსის, არასამთავრობო ორგანიზაციების, ასევე მედიისა და პოლიტიკური პარტიების წარმომადგენლებს შეხვდებიან და პრესკონფერენციებს გამართავენ, 31 მარტს კი, კონგრესის წევრები ქვეყნის სხვადასხვა რეგიონებში არჩევნების პროცესს დააკვირდებიან.
თურქეთის ადგილობრივი არჩევნების შესახებ წინასწარი შეფასებებისა და მონიტორინგის შედეგები 1 აპრილს დაგეგმილ პრესკონფერენციაზე იქნება წარმოდგენილი.