სტრასბურგში ევროპის საბჭოს ადგილობრივ და რეგიონულ ხელისუფალთა კონგრესის 50-ე სესიაზე, ქ. ფოთის მუნიციპალიტეტის მერმა, ბექა ვაჭარაძემ მონაწილეობა მიიღო თემატურ დისკუსიაში — „თავისუფალი არჩევნები ადგილობრივ და რეგიონულ დონეზე“.
დელეგატმა სიტყვით გამოსვლისას ყურადღება გაამახვილა ქალაქის ევროპულ იდენტობასა და დემოკრატიულ პრინციპებზე. მისი განცხადებით, ევროპა არ არის მხოლოდ გეოგრაფიული არჩევანი – ეს არის ღირებულებითი არჩევანი, რომელიც ეფუძნება დემოკრატიას, კანონის უზენაესობას, ადამიანის უფლებების დაცვასა და სუვერენიტეტის პატივისცემას, რაზეც შენდება სახელმწიფოებრივი და ადგილობრივი მმართველობა.
ბექა ვაჭარაძემ ასევე ვრცლად ისაუბრა საქართველოში ჩატარებულ არჩევნებზე და განმარტა, რომ აღნიშნული პროცესი დემოკრატიის სრულფასოვან გამოხატულებას წარმოადგენდა. როგორც მუნიციპალიტეტის მერმა აღნიშნა, ფოთში მმართველმა გუნდმა აქცენტი ამომრჩეველთან პირდაპირ კომუნიკაციასა და მათ საჭიროებებზე დაფუძნებულ კამპანიაზე გააკეთა. ოპოზიციის ნაწილმა კი ამომრჩეველთან დიალოგის ნაცვლად კამპანია გარე შეფასებებზე ააგო, რამაც მათ მიმართ ნდობის ნაკლებობა გამოიწვია.
დელეგატმა სიტყვით გამოსვლისას განსაკუთრებული აქცენტი საარჩევნო პროცესში დანერგილ ტექნოლოგიურ სიახლეებზე გააკეთა.
,,განსაკუთრებით მნიშვნელოვანია აღინიშნოს, რომ არჩევნები ჩატარდა თანამედროვე, ელექტრონული სისტემების გამოყენებით – იმ სტანდარტებით, რომლებიც სრულად გამორიცხავს მანიპულაციის შესაძლებლობას. შესაბამისად, შედეგების მიუღებლობა გარკვეული პოლიტიკური ჯგუფების მხრიდან ვერ იქნება საფუძველი დემოკრატიული პროცესის დისკრედიტაციისთვის. ასევე აღსანიშნავია, რომ არჩევნების შედეგების გამოცხადებამდე ელექტრონული სისტემის სანდოობა ოპოზიციის მხრიდან ეჭვქვეშ არ დამდგარა – პირიქით, ისინი მას მიესალმებოდნენ, თუმცა, შედეგების გამოქვეყნების შემდეგ მათი პოზიცია შეიცვალა”,- აღნიშნა ბექა ვაჭარაძემ.
მუნიციპალიტეტის მერის განცხადებით, ფოთში ოპოზიციის მიერ კონკურენციაზე უარის თქმის მიუხედავად, ამომრჩეველთა მაღალი აქტივობა დაფიქსირდა, რაც რეფორმებისა და საარჩევნო სისტემისადმი ნდობაზე მიუთითებს.
,,ჩვენთვის მიუღებელია ნებისმიერი მცდელობა, რომელიც ემსახურება დეზინფორმაციის გავრცელებასა და დემოკრატიული ინსტიტუტების მიზანმიმართულ დისკრედიტაციას. ფაქტებზე დაფუძნებული შეფასება, ობიექტურობა და პასუხისმგებლიანი დიალოგი არის ის პრინციპები, რომელზეც უნდა იდგეს ჩვენი საერთო თანამშრომლობა”, – განაცხადა ბექა ვაჭარაძემ და კიდევ ერთხელ ხაზგასმით აღნიშნა, რომ საქართველო აგძელებს განვითარებას, რომელიც დგას ევროპული ოჯახის ტრადიციულ ღირებულებებზე: ადამიანის ღირსებაზე, ქვეყნის სუვერენიტეტზე, თავისუფლებასა და დემოკრატიაზე.