სტრასბურგში, ევროპის საბჭოს ადგილობრივი და რეგიონული ხელისუფლებების კონგრესის 50-ე სესიაზე, საქართველოს ახალი დელეგაციის ხუთწლიანი მანდატი ოფიციალურად დადასტურდა.
დელეგაცია, რომელიც კონგრესს საქართველოს ადგილობრივ თვითმმართველობათა ეროვნულმა ასოციაციამ (ა.თ.ე.ა.) წარუდგინა, წევრთა უფლებამოსილების ცნობის პროცედურის შედეგად დამტკიცდა.
ქართულ დელეგაციას კვლავ ქ. თბილისის მუნიციპალიტეტის მერი და ა.თ.ე.ა-ს პრეზიდენტი, კახა კალაძე უხელმძღვანელებს. მის მოადგილედ კი ქ. თბილისის მუნიციპალიტეტის საკრებულოს წევრი, იურიდიულ საკითხთა და ადამიანის უფლებათა დაცვის კომისიის თავმჯდომარე, ნინო ვარდოსანიძე დასახელდა.
დელეგაციის ძირითად შემადგენლობაში ასევე შედიან აჭარის ავტონომიური რესპუბლიკის უმაღლესი საბჭოს წევრი, გოგი ფუტკარაძე, ქ. ფოთის მუნიციპალიტეტის მერი, ბექა ვაჭარაძე და ზუგდიდის მუნიციპალიტეტის საკრებულოს წევრი, ბელა მოსია.
რაც შეეხება შემცვლელ წევრებს, კონგრესმა აღნიშნულ პოზიციებზე ქ. თბილისის მუნიციპალიტეტის საკრებულოს თავმჯდომარის, ზურაბ აბაშიძის, გარდაბნის მუნიციპალიტეტის საკრებულოს წევრის, თამარ ხაჩიძის, ლანჩხუთის მუნიციპალიტეტის საკრებულოს წევრის, ვერიკო კვირკველიას, ასევე ახალციხის მუნიციპალიტეტის მერის ვარლამ წიკლაურისა და ქ. ქუთაისის მუნიციპალიტეტის საკრებულოს წევრის, თეკლა მებურიშვილის კანდიდატურები დაამტკიცა.
აღსანიშნავია, რომ საქართველოს ადგილობრივ თვითმმართველობათა ეროვნული ასოციაცია (ა.თ.ე.ა.) საქართველოს მთავრობის პარტნიორია ევროპის საბჭოს ადგილობრივ და რეგიონულ ხელისუფლებათა კონგრესის თვითმმართველობათა პალატაში დელეგაციის წარდგენისას.
ევროპის საბჭოს ადგილობრივ და რეგიონულ ხელისუფალთა კონგრესი პან-ევროპული პოლიტიკური კრებაა, რომელიც 200 000-ზე მეტი ხელისუფლების 612 წარმომადგენელს აერთიანებს 46 ევროპული ქვეყნიდან.
კონგრესის დანიშნულებაა დემოკრატიის მხარდაჭერა ადგილობრივ და რეგიონულ დონეზე, ადგილობრივი და რეგიონული მთავრობების შესაძლებლობების გაუმჯობესება და ხელისუფლების თვითმმართველობების გაძლიერება. მისთვის განსაკუთრებით მნიშვნელოვანია ევროპის საბჭოს ქარტიის მიერ ადგილობრივი თვითმმართველობებისთვის დადგენილი პრინციპების შესრულება. ის ხელს უწყობს დელეგირებისა და რეგიონალიზაციის პროცესებს და ქალაქებსა და რეგიონებს შორის თანამშრომლობას.