ბრიუსელში დასრულდა PLATFORMA-ს აღმოსავლეთ პარტნიორობის მეხუთე კლასტერული შეხვედრა, რომელიც საქართველოს ადგილობრივ თვითმმართველობათა ეროვნული ასოციაციის (ა.თ.ე.ა.) მიერ მიღწეული პროგრესის გაზიარებით დაიხურა.
სესიის ბოლოს, ასოციაციის წარმომადგენლებმა ა.თ.ე.ა.- ს აღმასრულებელი დირექტორის მოადგილემ, ტატიანა ბოკუჩავამ და ა.თ.ე.ა.-ს ექსპერტმა, ნინო ზურაბიშვილმა პარტნიორ ქვეყნებს საქართველოში ბოლო პერიოდში განხორციელებული ინსტიტუციური მიღწევები გააცნეს.
ტატიანა ბოკუჩავამ ხაზგასმით აღნიშნა PLATFORMA-სა და NALAS-სთან არსებული ეფექტური თანამშრომლობა, რომელიც ხელს უწყობს დეცენტრალიზაციის რეფორმების განხორციელებას, ადგილობრივი თვითმმართველობის ინსტიტუციური გაძლიერების პროცესს და დემოკრატიული მონაწილეობისთვის საჭირო ინიციატივების ხელშეწყობას.
ასოციაციის დირექტორის მოადგილემ დამსწრე საზოგადოებას, სხვა მიმართულებებთან ერთად, ა.თ.ე.ა.-ს სამართლებრივ საკითხთა კომიტეტის მუშაობა გააცნო და დასძინა, რომ მისი შექმნის ინიციატივა სწორედ 2024 წლის მარტში სტრასბურგში ჩატარებულ Peer-Exchange შეხვედრაზე გაჩნდა.
ტატიანა ბოკუჩავას განცხადებით, აღნიშნული ინიციატივა ერთ წელიწადში ა.თ.ე.ა.-ს სრულფასოვან ინსტრუმენტად გადაიქცა და საქართველოს პარლამენტის კომიტეტებთან თანამშრომლობით, უკვე ორი კონკრეტული საკანონმდებლო ცვლილების ინიცირებას დაეხმარა მუნიციპალიტეტების სასარგებლოდ.
ბოლო წელბში ა.თ.ე.ა.-ს მიერ დაფუძნებულ პლატფორმებზე ისაუბრა ნინო ზურაბიშვილმა და აღნიშნა, რომ ასოციაცია ეტაპობრივად ქმნის მრავალდონიან თემატურ და რეგიონულ პლატფორმებს – რეგიონულ ქსელებს და თვითმმართველი ქალაქებისა და მაღალმთიანი მუნიციპალიტეტების თემატურ ჯგუფებს, რათა სხვადასხვა საჭიროებების მქონე მუნიციპალიტეტებს ჰქონდეთ საკუთარი სივრცე და შესაძლებლობა პოლიტიკის ფორმირებაში ჩართულობისთვის.
ექსპერტმა ასევე მადლობა გადაუხადა NALAS-სა და PLATFORMA-ს კვლევითი მხარდაჭერისთვის, მათ შორის სოციალური სერვისების დეცენტრალიზაციისა და ციფრული სერვისების განვითარების მიმართულებით, რომლის გარეშეც სრულყოფილი და ეფექტიანი ვერ იქნებოდა მიმდინარე მასშტაბური ანალიტიკურ პროცესები. მისი განმარტებით, კვლევები ასოციაციას ეხმარება გააზრებულად განსაზღვროს სად, როგორ და რა მოცულობით არის შესაძლებელი უფლებამოსილებების გადაცემა, რა მხარდაჭერა სჭირდებათ მუნიციპალიტეტებს და რა ცვლილებებია საჭირო პროცესის ეფექტურად წარმართვისთვის.
ნინო ზურაბიშვილმა ა.თ.ე.ა.-ს საუკეთესო პრაქტიკის პროგრამაზეც (BPP) ისაუბრა და აღნიშნა, რომ ყოველწლიური კონკურსი კარგი პრაქტიკის გაზიარებასთან ერთად ხელს უწყობს მუნიციპალიტეტების საქმიანობის ხილვადობის ზრდას.
ბრიუსელში გამართულ PLATFORMA-ს აღმოსავლეთ პარტნიორობის რიგით მეხუთე კლასტერული შეხვედრას, სხვადასხვა ქვეყნის ადგილობრივ თვითმმართველობათა ასოციაციები და პარტნიორი ორგანიზაციები, ასევე ა.თ.ე.ა.-ს აღმასრულებელი დირექტორის მოადგილე ლაშა არჩაძე ესწრებოდნენ.