2-6 ივნისს, საქართველოს ადგილობრივ თვითმმართველობათა ეროვნულმა ასოციაციამ (ა.თ.ე.ა) უმასპინძლა პროექტის „EcoYOU: ეკოლოგიურად სუფთა და მწვანე აზროვნება ეკომეგობრული ქცევისათვის“ პარტნიორებს რუმინეთიდან და მოლდოვიდან.
ვიზიტის ფარგლებში ჩატარდა სხვადასხვა ტიპის ღონისძიებები, რომლებიც ა.თ.ე.ა-ს ორგანიზებით, ა(ა)იპ გორის მუნიციპალიტეტის განვითარებისა და ტანისა და თეძმის დაცული ლანდშაფტის სააგენტოს მხარდაჭერითა და ახალგაზრდა მკვლევართა და ანალიტიკოსთა გაერთიანების პრეზიდენტის, სოსო მეზვრიშვილის აქტიური ჩართულობით მოეწყო.
ღონისძიებების მთავარი მიზანი იყო გარემოსდაცვითი ცნობიერების ამაღლება, ეკომეგობრული პრაქტიკის ხელშეწყობა და ახალგაზრდებისა და ადგილობრივი თემების ჩართულობის გაძლიერება.
აქტივობებში მონაწილეობა მიიღეს ა.თ.ე.ა-ს აღმასრულებელი დირექტორის მოადგილეებმა – ტატიანა ბოკუჩავამ და ლაშა არჩვაძემ, ასევე საერთაშორისო პროექტების განვითარების მენეჯერმა- მარიამ ჯინჭარაძემ, უცხოელმა პარტნიორებმა, ადგილობრივმა ახალგაზრდებმა, არასამთავრობო ორგანიზაციების წარმომადგენლებმა, გორის მუნიციპალიტეტის მერიისა და საკრებულოს თანამშრომლებმა, მასწავლებლებმა და თემით დაინტერესებულმა პირებმა.
ხუთდღიანი პროგრამა მოიცავდა როგორც თეორიულ, ისე პრაქტიკულ ნაწილს – მათ შორის დისკუსიებს ბიომრავალფეროვნებაზე და ეკოლოგიურად პასუხისმგებელ ქცევებზე, ეკო-ბანაკის მოწყობის ტრენინგს, ფოკუს ჯგუფების მუშაობას და ერთობლივ ბანაკს.
მონაწილეებმა გაცვალეს საგანმანათლებლო და ინსპირაციული გამოცდილება, რომელიც მიზნად ისახავდა გარემოსდაცვითი ცნობიერების ამაღლებასა და მდგრადი პრაქტიკის დანერგვას.
განსაკუთრებული ყურადღება დაეთმო ნარჩენების მართვას, ბუნებრივ გარემოზე ზემოქმედების მინიმიზაციას და მდგრადი მასალების გამოყენებას.
5 ივნისს, გარემოს დაცვის საერთაშორის დღეს კი, პროექტის ფარგლებში გაიმართა დასუფთავების აქცია, სადაც ახალგაზრდებმა აქტიურად მიიღეს მონაწილეობა.
აღნიშნულ დღესთან დაკავშირებით, ასევე ჩატარდა შეხვედრა სახელწოდებით „8 ზეგანაკვეთური საათი ეკოლოგიურად დადებითი ზემოქმედებისთვის“, სადაც სხვადასხვა დარგის სპეციალისტებმა მონაწილეებს პროფესიული გამოცდილება გაუზიარეს. პარალელურად მიმდინარეობდა ფოკუს ჯგუფების დისკუსიაც.
პროექტს, რომელიც ხორციელდება შავი ზღვის აუზის პროგრამის (Interreg VI-B NEXT Black Sea Basin Programme) ფარგლებში ევროკავშირის თანადაფინანსებით, საქართველოში ახორციელებს ადგილობრივ თვითმმართველობათა ეროვნული ასოციაცია (ა.თ.ე.ა).
პროექტის მიზანია თემებისა და ადგილობრივი ხელისუფლების ორგანოების ჩართულობის დონის გაზრდა გარემოს დაცვის აქტივობებში, განსაკუთრებით მიკროპლასტმასის შემცირების კუთხით მდინარეების, ტბებისა და ზღვის სანაპიროებზე.
პროექტი “EcoYOU” უზრუნველყოფს ტრანსნაციონალურ თანამშრომლობას გარემოსდაცვით არასამთავრობო ორგანიზაციებს, საგანმანათლებლო დაწესებულებებს, საჯარო მოხელეებსა და ახალგაზრდულ ჯგუფებს შორის, რათა საერთო რესურსების გამოყენებითა და გამოცდილებების გაზიარებით ეფექტურად გადაწყდეს დაბინძურების პრობლემები.
აღნიშნული პროექტი ასევე ხორციელდება მოლდოვისა და რუმინეთის რესპუბლიკებში.