ევროპის მუნიციპალიტეტთა და რეგიონთა საბჭოს (CEMR) პოლიტიკური კომიტეტის სხდომის ფარგლებში, დედაქალაქში ვიზიტით მყოფი დელეგაციის წარმომადგენლები, წეროვანის დევნილთა დასახლებაში, ასევე რუსეთის მიერ ოკუპირებული რეგიონის გამყოფ ხაზთან იმყოფებოდნენ.

CEMR-ის გენერალური მდივანი – ფაბრიციო როსი და საქართველოს ადგილობრივ თვითმმართველობათა ეროვნული ასოციაციის მიერ, ევროპის მუნიციპალიტეტთა და რეგიონთა საბჭოში წარდგენილი ვიცე -პრეზიდენტი, თბილისის საკრებულოს წევრი – ნინო რუხაძე, სოფელ ოძისში ჩავიდნენ, ადგილობრივ მოსახლეობას შეხვდნენ და მიმდებარე საოკუპაციო ხაზთან არსებულ სიტუაციას პირადად გაეცნენ.

სტუმრებთან ერთად, საოკუპაციო ხაზთან, ასევე იმყოფებოდნენ ათეას მიერ CEMR-ში წარდგენილი ქართული დელეგაციის წევრებიც.

ფაბრიციო როსიმ, აღნიშნულ ვიზიტს მნიშვნელოვანი უწოდა და კიდევ ერთხელ დააფიქსირა, რომ CEMR საქართველოს სრულ მხარდაჭერას უცხადებს.

„ჩვენ მადლიერი ვართ ქალაქ თბილისის და ადგილობრივ თვითმმართველობათა ეროვნული ასოციაციის. ჩვენ აქ ჩამოვედით, რათა გამოვხატოთ ჩვენი მხარდაჭერა ადგილობრივი მმართველობის მიმართ. ჩვენ ვართ ევროპის რეგიონული მუნიციპალური საბჭო და ვუცხადებთ სრულ მხარდაჭერას საქართველოს ხელისუფლებას. ჩვენ მხარს ვუჭერთ საქართველოს, უკრაინას და მოლდოვას, რათა ისინი შეუერთდნენ ევროკავშირს. ჩვენ მოგვეცა შესაძლებლობა, რომ მოვსულიყავით საოკუპაციო ხაზთან. ჩვენ გავესაუბრეთ იძულებით გადაადგილებულ პირებს, ჩვენ გადავცემთ მათ მონათხრობს ყველას, გავავრცელებთ ზუსტ მესიჯებს და ეს იქნება ჩვენი მხარდაჭერა. ჩვენი აქ ყოფნა საკმაოდ ძლიერი გზავნილია ყველასთვის, განსაკუთრებით ევროპისთვის, ევროკავშირისთვის,“- განაცხადა ფაბრიციო როსიმ.

CEMR-ის ვიცე პრეზიდენტის – ნინო რუხაძის განაცხადებით, საქართველოს თვითმმართველობები ქვეყნის ევროინტეგრაციის საქმეში მნიშვნელოვან როლს ასრულებენ.

„თბილისი ევროპის მუნიციპალიტეტების და რეგიონების საბჭოს კომიტეტის სხდომას მასპინძლობს. ადამიანები, რომლებიც ჩვენს დედაქალაქს სტუმრობენ, საქართველოს დიდი მეგობრები არიან და აქტიურად უჭერენ მხარს ქვეყნის ევროინტეგრაციას. ჩვენ არ შეგვეძლო შემთხვევით არ გვესარგებლა და ეს ადამიანები არ ჩამოგვეყვანა საოკუპაციო ხაზთან. ჩვენ გვჯერა, რომ ერთ-ერთი გადაწყვეტა ამ უდიდესი პრობლემის საქართველოს ევროსტრუქტურებში გაერთიანება იქნება,“ – განაცხადა ნინო რუხაძემ.

დელეგაციის წევრები, ასევე ადგილობრივ კულტურის სახლს და საჯარო სკოლას ეწვივნენ და მოსწავლეების მიერ შესრულებული ნახატების გამოფენა დაათვალიერეს.

სტუმრებს ახალგორის მუნიციპალიტეტის გამგებელმა გელა შერმადინმა, სსიპ – დევნილთა, ეკომიგრანტთა და საარსებო წყაროებით უზრუნველყოფის სააგენტოს ინტეგრაცია-რეინტეგრაციისა და იძულებით გადაადგილებულ პირთა ეკონომიკური მხარდაჭერის სამსახურის უფროსმა დავით ფეიქრიშვილმა და მცხეთა-მთიანეთში სახელმწიფო რწმუნებულის მოადგილემ გოჩა ქავთარაძემ უმასპინძლეს.

აღსანიშნავია, რომ ევროპის რეგიონთა და მუნიციპალიტეტთა საბჭო (CEMR), რომელშიც ათეა 2010 წლიდანაა გაწევრიანებული, უძველესი და ფართომასშტაბიანი რეგიონული და ადგილობრივი მმართველობის ევროპული ასოციაციაა და ის ერთადერთი ორგანიზაციაა, რომელიც 41 ევროპული ქვეყნის ადგილობრივი თვითმმართველობის ასოციაციებს აერთიანებს.