გაეროს განვითარების პროგრამის (UNDP), დანიის საგარეო საქმეთა სამინისტროსა და საქართველოს მთავრობის მხარდაჭერით, განხორციელებული პროექტის – “დეცენტრალიზაციისა და კარგი მმართველობის ხელშეწყობა ადგილობრივ დონეზე“ ფარგლებში, საქართველოს ადგილობრივ თვითმმართველობათა ეროვნული ასოციაციის (NALAG) ორგანიზებით, ეროვნული კონფერენცია “საქართველოს მუნიციპალიტეტების მიერ სოციალურ და ჯანდაცვის სფეროში დელეგირებული უფლებამოსილებების აღსრულების გამოცდილების შეფასება და კარგი პრაქტიკების გამოვლენა“ გაიმართა.

ღონისძიებას, რომელიც სასტუმროში ,, ბილტმორ – თბილისი“ მოეწყო, საქართველოს მთავრობის, პარლამენტის, ადგილობრივი ხელისუფლების, საერთაშორისო ორგანიზებისა და სოციალურ სფეროში მომუშავე არასამთავრობო ორგანიზაციების წარმომადგენლები ესწრებოდნენ.

ეროვნული კონფერენციის დღის წესრიგი მოიცავდა მუნიციპალიტეტების მიერ სოციალური და ჯანდაცვის სფეროში უფლებამოსილებათა განხორციელების შედეგებისა და გამოწვევების განხილვას, კვლევის „მუნიციპალიტეტების შესაძლებლობათა შეფასების შესახებ“ ანგარიშის წარდგენას და იმ ხუთი მუნიციპალიტეტის დაჯილდოებას, რომლებმაც 2021 წელს სოციალური და ჯანდაცვის სფეროში წარმატებული პროექტები განახორციელეს.

კონფერენცია გახსნეს და მონაწილეებს მისასალმებელი სიტყვით მიმართეს, საქართველოს რეგიონული განვითარებისა და ინფრასტრუქტურის მინისტრის მოადგილემ – მზია გიორგობიანმა და საქართველოში UNDP-ის მუდმივმა წარმომადგენელმა – ნიკ ბერესფორდმა.

გამომსვლელებმა, მუნიციპალიტეტებს შორის კარგი პრაქტიკის გაზიარების მნიშვნელობას გასუსვეს ხაზი და დეცენტრალიზაციის რეფორმის განხორციელების ფარგლებში, უფრო მეტი უფლებამოსილებების დელეგირებაზე ისაუბრეს, რაც ადგილობრივ დონეზე კარგი მმართველობის ხელშეწყობას ისახავს მიზნად.

სოციალურ და ჯანდაცვის სფეროში უფლებამოსილებათა დელეგირების შესახებ იმსჯელეს და აღნიშნული მიმართულებით მუნიციპალიტეტებში არსებული ვითარება შეაფასეს, საქართველოს რეგიონული განვითარებისა და ინფრასტრუქტურის სამინისტროს ადგილობრივი თვითმმართველობის განვითარებისა და პოლიტიკის დეპარტამენტის უფროსმა – ნიკოლოზ როსებაშვილმა და საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს სოციალური დაცვის პოლიტიკის სამმართველოს უფროსის მოვალეობის შემსრულებელმა – ნატო ჩაფიძემ.

ათეა-ს აღმასრულებელმა დირექტორმა -დავით მელუამ კი, დამსწრე საზოგადოებას, ჯანდაცვის პროგრამების სფეროში მუნიციპალიტეტების შესაძლებლობათა შეფასების კვლევის ანგარიში წარუდგინა, რომელიც საქართველოს 44 მუნიციპალიტეტში ჩატარდა. მანვე ისაუბრა კვლევის ძირითად მიგნებებზე და განაცხადა, რომ აღნიშნული დოკუმენტის სრული ვერსიის ნახვა ასოციაციის პორტალზე იქნება შესაძლებელი.

დავით მელუას განმარტებით, ვინაიდან თვითმმართველობებში აღნიშნული პროცესის აღსრულება საწყის ფაზაშია, 2021 წლის კარგი პრაქტიკის გაზიარების პროგრამიდან, ათეა-სა და UNDP -ის გადაწყვეტილებით, ცალკე გამოიყო სოციალურ სფეროში დელეგირებული უფლებამოსილების განხორციელების თემა და ასეთი პრაქტიკის ანალიზს უფრო მეტი დრო დაეთმო. შესაბამისად, დღეს, სწორედ ის მუნიციპალიტეტები გამოავლინეს, რომლებიც სოციალურ პროექტებს უშუალოდ ახალ კანონმდებლობასთან მიმართებაში ახორციელებენ, თუმცა, მისივე განცხადებით, სოციალური სფერო კვლავ იქნება წარმოდგენილი საუკეთესო პრაქტიკის პროგრამის ყოველწლიურ კონკურსში, სადაც ყველა მუნიციპალიტეტს მიეცემა საშუალება წარმოაჩინოს ინოვაციური პროგრამები.

კონფერენციის დასკვნით ეტაპზე, გაიმართა ხუთი მუნიციპალიტეტის დაჯილდოების ცერემონია.

სოციალურ და ჯანდაცვის სფეროებში საუკეთესო მუნიციპალური პროგრამებისთვის სიგელები გადაეცათ;

• ლანჩხუთის თემთა მუნიციპალიტეტს – აუტისტური სპექტრის მქონე ბავშვთა სარეაბილიტაციო კურსის დაფინანსების პროგრამისთვის,

• სენაკის თემთა მუნიციპალიტეტს – ხანდაზმულ მოქალაქეთა ბინაზე დახმარების მუნიციპალური პროგრამისთვის,

• შუახევის თემთა მუნიციპალიტეტს – სოფლად მცხოვრები სოციალურად დაუცველი ქალების ეკონომიკური გაძლიერების პროგრამისთვის,

• ქალაქ ბათუმის მუნიციპალიტეტს – პერსონალური ასისტენტის მომსახურების მიმწოდებელ პირთა გადამზადების პროგრამისთვის,

• გორის თემთა მუნიციპალიტეტს – ძალადობის შედეგად ფსიქოთერაპიის საჭიროების მქონე ბავშვებს სპეციალური რეაბილიტაციის პროგრამისთვის.