საქართველოს ადგილობრივ თვითმმართველობათა ეროვნული ასოციაციის (NALAG) მიერ, ევროპის საბჭოს კონგრესში წარდგენილი ქართული დელეგაცია – კონგრესის ადგილობრივი ხელისუფლების პალატის წარმომადგენლის – ნინო ქავთარაძის ხელმძღვანელობითა და თბილისის საკრებულოს თავმჯდომარის – გიორგი ტყემალაძის, დედაქალაქის წარმომადგენლობითი ორგანოს წევრების – ლევან ჟორჟოლიანისა და ოთარ გრიგოლიას, ასევე, სენაკის საკრებულოს წევრის – სევდია უგრეხელიძის შემადგენლობით, ევროპის საბჭოს ადგილობრივ და რეგიონულ ხელისუფლებათა კონგრესის 42-ე პლენარულ სესიაში იღებს მონაწილეობას.
კონგრესის დელეგატებს სესიაზე სიტყვით მიმართავს კიევის მერი – ვიტალი კლიჩკო. აქვე, მიღებული იქნება დეკლარაცია უკრაინის წინააღმდეგ რუსეთის ფედერაციის აგრესიის შესახებ, რომელშიც მკაცრად არის დაგმობილი რუსეთის ფედერაციის მიერ უკრაინის წინააღმდეგ განხორციელებული აგრესია. კონგრესი ხაზს უსვამს, რომ დემოკრატია, მრავალდონიანი მმართველობა და ადამიანის უფლებები ომზე ძლიერი ღირებულებებია. კონგრესი მტკიცედ დგას უკრაინისა და მისი ხალხის გვერდით და ევროპისა და არამხოლოდ ევროპის ყველა ადგილობრივი და რეგიონული დონის თემს უკრაინის, მისი ხალხის და მისი ხელისუფლების მიმართ ურყევი სოლიდარობისკენ და მტკიცე მხარდაჭერისკენ მოუწოდებს.
42-ე პლენარულ სესიაზე კონგრესის დელეგატებს, ასევე, სიტყვით მიმართავენ ევროპის საბჭოს გენერალური მდივანი მარია პეინჩინოვიჩ ბურიჩი, ევროპის საბჭოს საპარლამენტო ასამბლეის პრეზიდენტი ტინი კოქსი და იტალიის რეგიონებისა და ავტონომიის საქმეთა მინისტრი მარიასტელა ჯელმინი.
სესიის მეორე დღეს, 23 მარტს კი, ადგილობრივი ხელისუფლების პალატის შეხვედრის ფარგლებში, დაგეგმილია საქართველოში 2021 წლის ოქტომბერში ჩატარებული ადგილობრივი თვითმმართველობის არჩევნების სადამკვირვებლო მისიის ანგარიშის მიღება.
კონგრესის სადამკვირვებლო მისია ცალსახად დადებითად აფასებს საქართველოში ჩატარებულ არჩევნებს და აღნიშნავს, რომ არჩევნები იყო თანმიმდევრული და კარგად ორგანიზებული. დადებითად იქნა შეფასებული საარჩევნო კანონმდებლობაში მიღებული ბოლო ცვლილებები. კონგრესის სადამკვირვებლო მისიამ ანგარიშში აღნიშნა, რომ საქართველოში არსებული საკანონმდებლო ჩარჩო ხელსაყრელ გარემოს ქმნის დემოკრატიული არჩევნების ჩასატარებლად.
აღსანიშნავია, რომ ანგარიშის წინასწარი, საკომიტეტო განხილვის დროს მომხსენებელმა გაითვალისწინა თბილისის მუნიციპალიტეტის საკრებულოს იურიდიულ საკითხთა და ადამიანის უფლებათა დაცვის კომისიის თავმჯდომარის ლევან ჟორჟოლიანის მიერ გაზიარებული რიგი შესწორებები.