საქართველოს ადგილობრივ თვითმმართველობათა ეროვნული ასოციაცია (NALAG) დაფუძნებიდან 15 წლის იუბილეს აღნიშნავს.
საზეიმო მიღება, რომელიც თბილისის საკრებულოში მოეწყო, საქართველოს ადგილობრივ თვითმმართველობათა ეროვნული ასოციაციის პრეზიდენტმა, დედაქალაქის მერმა – კახა კალაძემ გახსნა.
ორგანიზაციის ხელმძღვანელმა ათეა-ს, როგორც ეროვნულ, ასევე საერთაშორისო დონეზე არსებულ მიღწევებზე ისაუბრა და ასოციაციას სამომავლოდ კიდევ უფრო გაძლიერება და წარმატებები უსურვა.
ღონისძიებაზე საქართველოს ადგილობრივ თვითმმართველობათა ეროვნული ასოციაციის 15 წლიანი საქმიანობა ათეა-ს ვიცე-პრეზიდენტებმა – გიორგი ტყემალაძემ და თამარ ტალიაშვილმა, ასევე ორგანიზაციის აღმასრულებელმა დირექტორმა – დავით მელუამ შეაფასეს და სამომავლო გეგმებზე ისაუბრეს.
იუბილეზე დამსწრე საზოგადოებას ასევე სიტყვით მიმართეს საქართველოს რეგიონული განვითარებისა და ინფრასტრუქტურის მინისტრმა – მაია ცქიტიშვილმა და საქართველოს პარლამენტის წევრებმა – სოფიო კილაძემ და ეკა ბესელიამ.
მოწვეულმა სტუმრებმა ორგანიზაციის მნიშვნელობაზე ისაუბრეს და ადგილობრივი დემოკრატიის განვითარებასა და დეცენტრალიზაციის პროცესში ასოციაციის ჩართულობას გაუსვეს ხაზი.
საიუბილეო მიღებაზე, რომელსაც ათეა-ს ყოფილი და ამჟამინდელი წევრები, ასევე საქართველოს ცენტრალური და ადგილობრივი ხელისუფლებისა და საერთაშორისო ორგანიზაციების წარმომადგენლები ესწრებოდნენ, ასოციაციის მიერ განხორციელებული ღონისძიებების ამსახველი ფოტოგამოფენა მოეწყო.
საქართველოს ადგილობრივ თვითმმართველობათა ეროვნული ასოციაცია არასამთავრობო, ორგანიზაციაა, რომელიც აერთიანებს საქართველოს ყველა ადგილობრივი თვითმმართველობის ერთეულს.
ასოციაციის მიზანია, ქვეყანაში ადგილობრივი თვითმმართველობის სისტემის სრულყოფა და ადგილობრივი დემოკრატიის განვითარება, სახელმწიფო ძალაუფლების დეცენტრალიზაცია და ადგილობრივი თვითმმართველობის ინსტიტუციების განვითარება.
საქართველოს ადგილობრივ თვითმმართველობათა ეროვნული ასოციაცია 2004 წლის 17 დეკემბერს ევროპის საბჭოსა და ევროკომისიის ერთობლივი ინიციატივის ფარგლებში დაფუძნდა.
ასოციაცია თანამშრომლობს მრავალ საერთაშორისო ორგანიზაციასთან და ადგილობრივი თვითმმართველობის ევროპულ გაერთიანებებთან.
ადგილობრივ თვითმმართველობათა ეროვნული ასოციაცია არის საქართველოს მთავრობის პარტნიორი ევროპის საბჭოს ადგილობრივ და რეგიონულ ხელისუფლებათა კონგრესის თვითმმართველობათა პალატაში დელეგაციის წარდგენისას.