1-4 აპრილს, ქ. სევილიაში გაიმართა ქალაქებისა და ადგილობრივი მმართველობის მსოფლიო ორგანიზაციის (UCLG) აღმასრულებელი ბიუროს შეხვედრა, რომელშიც ქართული მხრიდან ჩართულნი იყვნენ თბილისის მუნიციპალიტეტის საკრებულოს წევრები – ნინო ვარდოსანიძე და ანა კაკაბაძე.
ბიუროს შეხვედრა მოიცავდა სესიებსა და დიალოგებს, რომლებიც ეხებოდა ადგილობრივი ფინანსების მართვას, მუნიციპალიტეტებში ეკონომიკური განვითარების სტრატეგიებსა და მდგრადი განვითარების სხვადასხვა მიზნებს.
ქართული დელეგაციის წარმომადგენლები ასევე აქტიურად იყვნენ ჩართულნი ადგილობრივი ეკონომიკური განვითარების მსოფლიო ფორუმში, რომელიც UCLG-ის ორგანიზებით 3-4 აპრილს გაიმართა.
ფორუმზე ძირითად განსახილველ თემებს წარმოადგენდა: ზრუნვაზე დაფუძნებული მიდგომები, ადგილობრივი ეკონომიკური განვითარება; საშუალო ზომის ქალაქების ეკონომიკური და ტერიტორიული სტრატეგიები შესაძლებლობების შექმნის მიზნით; სოციალური განვითარების მსოფლიო სამიტისთვის მზადება: ინიციატივებისა და სინერგიების განვითარება; ადგილობრივი ეკონომიკური განვითარების დაფინანსება: სუბნაციონალური მთავრობების გამოწვევები; კონფლიქტში მყოფი ტერიტორიები: ადგილობრივი ეკონომიკური განვითარება, როგორც მშვიდობის დამყარების მექანიზმი.
ფორუმში მონაწილეობას იღებდნენ ადგილობრივი ხელისუფლების წარმომადგენლები, განვითარების და ეკონომიკის ექსპერტები, ასევე საერთაშორისო ორგანიზაციების წარმომადგენლები.
სევილიაში ვიზიტის ფარგლებში, ქართული დელეგაციის წარმომადგენლებმა ასევე შეხვედრა გამართეს აზია-წყნარი ოკეანის რეგიონის სექციის გენერალურ მდივანთან სადაც მხარეებმა ქართული და აღნიშნული რეგიონის მუნიციპალიტეტების თანამშრომლობის პერსპექტივებზე ისაუბრეს.