25 ნოემბერს, ქ.ბრიუსელში გაიმართა PLATFORMA-ს აღმოსავლეთ პარტნიორობის რიგით მეხუთე კლასტერული შეხვედრა, რომელსაც სხვადასხვა ქვეყნის ადგილობრივ თვითმმართველობათა ასოციაციები და პარტნიორი ორგანიზაციები ესწრებოდნენ.
შეხვედრაზე ქართულ მხარეს წარმოადგენდნენ საქართველოს ადგილობრივ თვითმმართველობათა ეროვნული ასოციაციის (ა.თ.ე.ა./NALAG) აღმასრულებელი დირექტორის მოადგილეები — ტატიანა ბოკუჩავა და ლაშა არჩვაძე, ასევე ასოციაციის ექსპერტი ნინო ზურაბიშვილი.
სესია გახსნა ევროპის მუნიციპალიტეტებისა და რეგიონების საბჭოს (CEMR) გენერალურმა მდივანმა, ფაბრიციო როსიმ, რის შემდეგაც მონაწილეებმა განიხილეს ევროკავშირის მრავალწლიანი ფინანსური ჩარჩოს (MFF) პრიორიტეტები, განსაკუთრებით აღმოსავლეთ მეზობლობისა და გაფართოების მიმართულებით.
ევროპარლამენტის კვლევითი სამსახურის (EPRS) მიერ წარმოდგენილი პრეზენტაციის შემდეგ გაიმართა დისკუსია, მათ შორის, ევროპარლამენტარ დან ბარნას ოფისის ხელმძღვანელ ლაურენციუ კოლინტინეანუსთან, სადაც ა.თ.ე.ა.-ს სახელით სიტყვით გამოვიდა ტატიანა ბოკუჩავა.
ასოციაციის წარმომადგენელმა საუბრისას ყურადღება გაამახვილა ევროკავშირის კანდიდატი ქვეყნების მუნიციპალიტეტების როლზე ევროინტეგრაციის პროცესში და აღნიშნა, რომ მომდევნო მრავალწლიანი ფინანსური ჩარჩო (MFF) უნდა ითვალისწინებდეს კონკრეტული რესურსების გამოყოფას მუნიციპალიტეტების მხარდასაჭერად. მისი თქმით განსაკუთრებული მნიშვნელობა აქვს გამოცდილების გაზიარებას, უნარების გაძლიერებას, პარტნიორ მუნიციპალიტეტებს შორის სწავლების ფორმატებსა და ისეთი კვლევების განხორციელებას, რომლებიც ადგილობრივ თვითმმართველობებს დაეხმარება ევროკავშირის დირექტივებისა და რეგულაციების უკეთ გაცნობიერებაში.
ტატიანა ბოკუჩავამ ასევე ხაზი გაუსვა ევროკავშირის ფონდების ათვისების მიმართულებით მუნიციპალიტეტების შესაძლებლობების გაძლიერების საჭიროებას. მისი თქმით, მნიშვნელოვანია როგორც ტექნიკური მხარდაჭერა, ისე პროექტების მართვის, ფინანსური ადმინისტრირების და ევროკავშირის ინსტრუმენტების გამოყენების უნარების გაუმჯობესება.
ქართული დელეგაციის წევრმა საუბრის დასასრულს ასევე აღნიშნა, რომ მუნიციპალიტეტების თანამშრომლებისთვის გაცვლითი ან სტაჟირების პროგრამები მნიშვნელოვნად შუწყობს ხელს ადგილობრივი თვითმმართველობების ევროპულ სტანდარტებთან შესაბამისობას.
EaP კლასტერის შიდა სამუშაო სესიაზე მონაწილეებმა განიხილეს 2026 წლის პოლიტიკისა და ადვოკატირების სამოქმედო გეგმის პროექტი და მომავალი აქტივობები. შეხვედრა შეჯამდა PLATFORMA-ს დირექტორის ბორის ტონჰაუზერის მიერ.
აღსანიშნავია, რომ ამავე დღეს NALAS-ისა და PLATFORMA-ს ორგანიზებით გაიმართა ევროპის სხვადასხვა ქვეყნების მუნიციპალურ ასოციაციებს შორის გამოცდილების გაზიარებისა და სწავლების სესია, რომელშიც ასევე აქტიური მონაწილეობა მიიღეს ქართული დელეგაციის წარმომადგენლებმა.