ევროპის საბჭოს კონგრესში ქართული დელეგაცია, 25-27 მარტს სტრასბურგში გამართულ ევროპის საბჭოს ადგილობრივ და რეგიონულ ხელისუფლებათა კონგრესის 48-ე პლენარულ სესიაში იღებს მონაწილეობას.
ქართულ მხარეს, რომელსაც ევროსაბჭოს კონგრესში დელეგაციის ხელმძღვანელის მოადგილე, თბილისის წარმომადგენლობითი ორგანოს თავმჯდომარის მოადგილე, ზურაბ აბაშიძე ხელმძღვანელობს, ასოციაციის ვიცე – პრეზიდენტი, დედაქალაქის საკრებულოს თავმჯდომარე – გიორგი ტყემალაძე, თბილისის, სენაკისა და ოზურგეთის წარმომადგენლობითი ორგანოების წევრები – ოთარ გრიგოლია, სევდია უგრეხელიძე და თათია ნიკოლაშვილი, აგრეთვე, – ქ. თბილისის მუნიციპალიტეტის მერიის ადმინისტრაციის მერიის აპარატის უფროსი, ირაკლი ჭინჭარაული წარმოადგენდნენ.
პლენარული სესია კონგრესის პრეზიდენტმა მარკ ქულსმა გახსნა. სხდომაზე სხვა თემებთან ერთად განიხილებოდა საკითხი საქართველოს ადგილობრივი და რეგიონული დემოკრატიის ვითარებასთან დაკავშირებით, სადაც ქართული დელეგაციის წევრები სიტყვით გამოვიდნენ.
დედაქალაქის საკრებულოს წარმომადგენლებმა ხაზგასმით აღნიშნეს, რომ საქართველოს ხელისუფლების მიზანია, ხელი შეუწყოს ქვეყნის ევროპული ინტეგრაციის პროცესს და რომ სახელისუფლებო გუნდს არასდროს უთქვამს უარი ევროინტეგრაციის პროცესზე.
სახელისუფლებო გუნდის წევრებმა დელეგატებს მოუწოდეს არ დაუჭირონ მხარი რეზოლუციას, რომელიც მიკერძოებულ აღქმებზეა დაფუძნებული და განმარტეს, რომ მსგავსი რეზოლუციები აღიქმება, როგორც ჩარევა ქვეყნის შიდა საქმეებში, რომელიც ანტაგონისტურად განწყობილ ჯგუფებს ახალისებს.
„ერთიანი ნაციონალური მოძრაობის“ წევრებმა, სევდია უგრეხელიძემ და თათია ნიკოლაიშვილმა სესიაზე სიტყვით გამოსვლისას ისაუბრეს პოლიტიკაში ქალთა მიმართ ძალადობაზე და ყურადღება გაამახვილეს ჟურნალისტ მზია ამაღლობელის დაკავებაზე. ოპოზიციის წევრების განცხადებით, მზია ამაღლობელი უკანონოდ დააკავეს პოლიტიკური მიზნების გამო. ის 38 დღე შიმშილობდა საპატიმროში, ხოლო მის წინააღმდეგ არ არსებობს მტკიცებულება.
საქართველოში მიმდინარე საპროტესტო აქციებზე ისაუბრა თბილისის საკრებულოს წევრმა ოთარ გრიგოლიამ და ხაზგასმით აღნიშნა, რომ პროტესტები, რომლებმაც განსაკუთრებით ინტენსიური ხასიათი გასული წლის ნოემბრიდან მიიღო, რიგ შემთხვევებში არ იყო მშვიდობიანი. მისი თქმით, აქციებზე სამართალდამცავ ორგანოებს მოუწიათ შესაბამისი რეაგირება, რათა უზრუნველყოთ მშვიდობიანი მომიტინგეების უსაფრთხოება და დაეცვათ სახელმწიფო ინფრასტრუქტურა.
,,ამ მოვლენების ფონზე, 150-ზე მეტი სამართალდამცველი დაშავდა, რაც თავისთავად მეტყველებს იმაზე, თუ როგორი ხასიათის იყო ქვეყანაში ბოლო დროს განვითარებული მოვლენები. შეფასებები კი, თითქოს აქციები იყო მშვიდობიანი და მათ პოლიცია უმიზეზოდ არბევდა არის უპასუხისმგებლო და რადიკალურ ჯგუფებს კარდინალური ქმედებებისკენ უბიძგებს“,- განაცხადა ოთარ გრიგოლიამ.
სესიის ფარგლებში სხდომის მონაწილეებმა, ასევე დეტალურად იმსჯელეს ისეთ მნიშვნელოვან საკითხებზე, როგორებიცაა: რუსეთის აგრესია უკრაინის წინააღმდეგ; ქალთა ძალადობა პოლიტიკაში და ადგილობრივი და რეგიონული დემოკრატია მსოფლიოში.
დებატები გაიმართა ეროვნული და საერთაშორისო პოლიტიკის თემებზე, სადაც წარმოდგენილი იყო საუკეთესო მაგალითები თუ როგორ შეიძლება ადგილობრივი ხელისუფლების წარმომადგენლებმა დაიცვან დემოკრატია და უზრუნველყონ უკეთესი ადგილობრივი მმართველობა.
სესიაზე ასევე ყურადღება გამახვილდება ბოსნია და ჰერცეგოვინაში ადგილობრივი არჩევნების მონიტორინგის შედეგებზე და თურქეთში მერთა დათხოვნის საკითხზე.