საქართველოს ადგილობრივ თვითმმართველობათა ეროვნული ასოციაციის (ა.თ.ე.ა) ორგანიზებითა და გაეროს ბავშვთა ფონდის (UNICEF) მხარდაჭერით, ზუგდიდის მუნიციპალიტეტში გაიმართა სამეგრელო-ზემო სვანეთისა და გურიის სოციალურ საკითხთა პლატფორმის გაერთიანებული სხდომა, სადაც მონაწილეებმა რეგიონებში სოციალური მომსახურების გაძლიერების საკითხები განიხილეს.
სხდომა პროექტის — „ადგილობრივი ხელისუფლების, ახალგაზრდებისა და სამოქალაქო საზოგადოების ხელშეწყობა ბავშვზე ორიენტირებული მდგრადი განვითარების მიზნების ლოკალიზაციაში საქართველოში“ — ფარგლებში მოეწყო, რომელსაც საქართველოს ადგილობრივ თვითმმართველობათა ეროვნული ასოციაცია ახორციელებს გაეროს ბავშვთა ფონდის (UNICEF) მხარდაჭერითა და მდგრადი განვითარების მიზნების გლობალური ფონდის დაფინანსებით.
ღონისძიება ფასილიტირებული დისკუსიის ფორმატში წარიმართა და მასში მონაწილეობა მიიღეს მუნიციპალიტეტების ხელმძღვანელმა პირებმა, ასევე სოციალური სამსახურებისა და ბავშვთა განყოფილებების უფროსებმა და სპეციალისტებმა.
შეხვედრა პროექტის ექსპერტმა, ნინო ზურაბიშვილმა (ა.თ.ე.ა) და UNICEF-ის სოციალური პოლიტიკის ოფიცერმა, ნინო დავითაშვილმა გახსნეს. სიტყვით გამოსვლისას ორგანიზატორებმა ხაზი გაუსვეს რეგიონული თანამშრომლობის მნიშვნელობას და ყურადღება გაამახვილეს პროექტის მიზნებსა და მომავალი თანამშრომლობის შესაძლებლობებზე.
სხდომის პირველ ნაწილში, ნინო ზურაბიშვილმა მონაწილეებს გააცნო ერთობლივი პროგრამების დაგეგმვისა და მიწოდების მნიშვნელობა და შესაძლებლობები. ექსპერტმა ასევე დეტალურად ისაუბრა ამგვარი ინიციატივების როლზე — როგორც ადგილობრივი საჭიროებების უკეთ დაძლევის, ისე სოციალური მომსახურების ხარისხისა და ეფექტიანობის გაუმჯობესების მიმართულებით.
დღესვე, მონაწილეებმა განიხილეს მუნიციპალიტეტების მიერ უკვე განხორციელებული ინიციატივები, რომლებიც სოციალური მომსახურების სფეროში არსებული საჭიროებების გათვალისწინებით იყო შემუშავებული.
გამოცდილებისა და კარგი პრაქტიკის გაზიარების მიზნით, ფოთის მუნიციპალიტეტის წარმომადგენელმა დამსწრე საზოგადოებას წარუდგინა პროგრამა, რომელიც მიზნად ისახავს მოსწავლეთა სასკოლო ნივთებით უზრუნველყოფას, სოციალური საჭიროების მქონე ბავშვების განათლებაზე ხელმისაწვდომობის გასაზრდელად. სენაკის მუნიციპალიტეტის მერიის წარმომადგენელმა კი კოლეგებს გააცნო ბავშვთა პროფილაქტიკური სამედიცინო კვლევის ქვეპროგრამა, რომელიც დაწყებითი კლასების მოსწავლეების ჯანმრთელობის მდგომარეობის შეფასებას და ჯანმრთელობის პრობლემების ადრეულ ეტაპზე გამოვლენას ითვალისწინებს.
შეხვედრაზე, მონაწილეებმა ასევე განსაკუთრებული ყურადღება დაუთმეს საჭიროებათა ციფრული კვლევის ინსტრუმენტისა და პორტალის პრეზენტაციას, რომელიც ექსპერტის განცხადებით, ხელს უწყობს სოციალურ პოლიტიკაში მონაცემებზე დაფუძნებულ გადაწყვეტილებებს.
სხდომის დასასრულს გაიმართა მოკლე შეჯამება, სადაც გამოიკვეთა ძირითადი რეკომენდაციები და მომდევნო ნაბიჯები რეგიონული თანამშრომლობის გასაძლიერებლად.