თბილისში მდგრადი განვითარების რეგიონული ფორუმი სახელწოდებით „მშვიდობის როლი მდგრად სოციალურ-ეკონომიკურ განვითარებაში“ გაიმართა, რომელშიც საქართველოს ადგილობრივ თვითმმართველობათა ეროვნული ასოციაციის აღმასრულებელმა დირექტორმა, ნინო რუხაძემ მიიღო მონაწილეობა.
ფორუმი ორ დღეს გაგრძელდა და მოიცავდა სხვადასხვა თემატურ პანელურ დისკუსიებს, რომელთაგან ერთ-ერთი საქართველოში მდგრადი განვითარების მიზნების ლოკალიზაციას დაეთმო.
აღნიშნულ სესიაზე სიტყვით გამოსვლისას ნინო რუხაძემ ხაზი გაუსვა იმ მნიშვნელოვან როლს, რომელსაც ადგილობრივი თვითმმართველობები ასრულებენ მდგრადი განვითარების მიზნების (SDG-ების) მიღწევის პროცესში.
„ადგილობრივი თვითმმართველობა მოქალაქეებთან ყველაზე ახლოს მდგომი სტრუქტურაა. სწორედ ამიტომ მდგრადი განვითარების მიზნების შესრულება შეუძლებელია ადგილობრივი თვითმმართველობის ჩართულობის გარეშე“ – აღნიშნა ა.თ.ე.ა-ს ხელმძღვანელმა.
ნინო რუხაძემ ფორუმის მონაწილეებს გააცნო ა.თ.ე.ა-ს საქმიანობა აღნიშნული მიმართულებით, მათ შორის მუნიციპალიტეტების მხარდაჭერის მექანიზმები, რომელთა მიზანსაც წარმოადგენს მდგრადი განვითარების მიზნების ინტეგრირება ადგილობრივ პოლიტიკასა და ბიუჯეტში.
ნინო რუხაძის განცხადებით, ასოციაცია აქტიურად მუშაობს მონაცემებზე დაფუძნებულ დაგეგმვაზე, ახორციელებს ტრენინგებსა და საკონსულტაციო სერვისებს, ამუშავებს პრაქტიკულ ინსტრუმენტებსა და გზამკვლევებს, რაც მუნიციპალიტეტებს აძლევს შესაძლებლობას უკეთ დაგეგმონ სოციალური სერვისები.
ასოციაციის ხელმძღვანელმა ასევე ისაუბრა UNICEF-ის მხარდაჭერით განხორციელებულ ინიციატივებზე, მათ შორის, ბავშვისა და ბავშვიანი ოჯახებისთვის ხელმისაწვდომი სერვისების კვლევის მეთოდოლოგიაზე, ბავშვზე ორიენტირებული ბიუჯეტირების მეთოდოლოგია და განხორციელდა ციფრული მონაცემთა შეგროვების ინსტრუმენტის განვითარება, რაც უკვე დაინერგა რამდენიმე მუნიციპალიტეტში, მათ შორის ფოთსა და ხაშურში.
„ეს ინსტრუმენტები არა მხოლოდ აადვილებს ადგილობრივ საჭიროებათა ანალიზს, არამედ აძლევს მუნიციპალიტეტებს საშუალებას გადადგან გაცილებით მიზანმიმართული ნაბიჯები ისეთი მოწყვლადი ჯგუფების მხარდასაჭერად, როგორიცაა ბავშვები და ბავშვიანი ოჯახები,“ – განაცხადა ა.თ.ე.ა-ს ხელმძღვანელმა.
დასასრულს, ნინო რუხაძემ ხაზი გაუსვა წარმატებული გამოცდილების გაზიარების მნიშვნელობას და იმ პლატფორმების როლს, რომლებიც ასოციაციისა და პარტნიორების ძალისხმევით უკვე მოქმედებს – მათ შორის, ა.თ.ე.ა-ს საუკეთესო პრაქტიკის კონკურსი, რომელიც ევროკავშირის მხარდაჭერით 2018 წლიდან ხორციელდება.
„ჩვენი მიზანია გავაძლიეროთ ადგილობრივი ხელისუფლებები და შევუწყოთ ხელი ისეთ პოლიტიკას, რომელიც რეალურად პასუხობს მოსახლეობის საჭიროებებს და ქმნის მდგრად განვითარების საფუძველს – ინკლუზიურ, მშვიდობიან და სამართლიან ადგილობრივ დონეზე,“ – აღნიშნა ნინო რუხაძემ.
ამავე პანელურ სესიაში მონაწილეობა მიიღეს ფოთის მუნიციპალიტეტის მერმა ბექა ვაჭარაძემ და ხაშურის მუნიციპალიტეტის საკრებულოს თავმჯდომარემ, ნინო ლიპარტელიანმა. ადგილობრივი ხელისუფლების პირველმა პირებმა სიტყვით გამოსვლისას წარადგინეს თავიანთი გამოცდილება მდგრადი მუნიციპალური სერვისების დაგეგმვის, ბავშვებზე მორგებული მონაცემთა შეგროვების და სურსათის უვნებლობის მართვის პრაქტიკის (HACCP სისტემის) დანერგვის მიმართულებით.
ა.თ.ე.ა-სა და მუნიციპალიტეტების წარმომადგენლებთან ერთად პანელურ სესიაში ასევე მონაწილეობდნენ – თბილისის მერიის, საქართველოს მთავრობის ადმინისტრაციის, UNICEF-ის, UNDP-ის, UN-Habitat-ისა და საქართველოს პარლამენტის წარმომადგენლები.
თბილისის მდგრადი განვითარების რეგიონული ფორუმი 5 ივნისს მისასალმებელი სიტყვით თბილისის მერმა, ა.თ.ე.ა-ს პრეზიდენტმა კახა კალაძემ პრემიერ-მინისტრ ირაკლი კობახიძესთან ერთად გახსნა.
ფორუმის (TBILISI RFSD) ფარგლებში, დედაქალაქი ყოველწლიურად მასპინძლობს როგორც ადგილობრივ, ისე საერთაშორისო დონის სპიკერებს, სხვადასხვა დარგის ექსპერტებს, მუნიციპალიტეტებისა და აკადემიური წრეების წარმომადგენლებს. ღონისძიების მიზანია გამოცდილების, თანამედროვე მიდგომებისა და იდეების გაზიარება, რაც თანამშრომლობის ჩამოყალიბებისა და ქალაქების განვითარების მდგრად და გრძელვადიან პერსპექტივას ქმნის. ფორუმზე განხილული იყო ისეთი თემები, როგორებიცაა: მდგრადი ეკონომიკური განვითარება, 8 000-წლიანი ტრადიციული მეღვინეობა, ჯანდაცვის სერვისების ხელმისაწვდომობა და ინოვაციები, განახლებადი ენერგიის მოხმარება და განვითარება, ცირკულარული ეკონომიკა, თანამედროვე ტენდენციები სამშენებლო სექტორში და სხვა.