საუკეთესო პრაქტიკის პროგრამის (BPP) ფარგლებში, ადგილობრივ თვითმმართველობათა ეროვნული ასოციაციის (ა.თ.ე.ა) ორგანიზებით, გაეროს ბავშვთა ფონდსა (UNICEF) და სსიპ ახალგაზრდობის სააგენტოსთან თანამშრომლობით, კონფერენცია გაიმართა.
ღონისძიების ერთ-ერთი პანელური დისკუსია ინტერმუნიციპალური თანამშრომლობის პროგრამების შესახებ მსჯელობას დაეთმო.
დისკუსიას საჯარო მმართველობის ექსპერტი კოკა კიღურაძე ხელმძღვანელობდა, რომელმაც პრეზენტაცია წარადგინა და ისაუბრა საჯარო მმართველობის თანამედროვე გამოწვევებზე — ფინანსური რესურსების შეზღუდვებზე, პრობლემების კომპლექსურობასა და მომსახურების ეფექტიანობის გაზრდის საჭიროებაზე. მისი განმარტებით აღნიშნული გამოწვევების საპასუხოდ ერთ-ერთი ყველაზე ეფექტური ინსტრუმენტი ინტერმუნიციპალური თანამშრომლობაა, რომელიც მუნიციპალიტეტებს ეხმარება გაზარდონ მომსახურების ეფექტიანობა, ხარისხი და ხელმისაწვდომობა შეზღუდული რესურსების პირობებში.
პრეზენტაციისას განსაკუთრებული ყურადღება დაეთმო საქართველოს კანონმდებლობას, რომელიც მუნიციპალიტეტებს ანიჭებს უფლებას ითანამშრომლონ ერთმანეთთან, შექმნან ერთობლივი იურიდიული პირები, სამსახურები ან დადონ ხელშეკრულებები საბიუჯეტო სახსრების გაერთიანების შესახებ.
პანელურ დისკუსიაში მონაწილეობდნენ: ნიკოლოზ ჯანიაშვილი- დედოფლისწყაროს მუნიციპალიტეტის მერი; ბაქარ გიუნაშვილი, შიდა ქართლის მიუსაფარ ცხოველთა მართვის სააგენტოს ხელმძღვანელი; გვანცა ირემაშვილი, HELVETAS-ის ადგილობრივი ეკონომიკური განვითარების პროექტის ლიდერის მოადგილე და ნიკოლოზ როსებაშვილი, საქართველოს რეგიონული განვითარების სამინისტროს ადგილობრივი თვითმმართველობის განვითარებისა და პოლიტიკის დეპარტამენტის უფროსი. მონაწილეებმა იმსჯელეს თუ როგორ შეიძლება წახალისდეს ინტერმუნიციპალური თანამშრომლობა და რა ინსტრუმენტები შეიძლება გამოყენებულ იქნას მის გასაძლიერებლად.
დისკუსიის დროს წარმოდგენილი იყო კარგი პრაქტიკის მაგალითები, მათ შორის კახეთისა და შიდა ქართლის რეგიონებში მიუსაფარი ცხოველების მოვლა-პატრონობის სფეროში განხორციელებული ინტერმუნიციპალური თანამშრომლობა.
განსაკუთრებული ყურადღება დაეთმო საკანონმდებლო ბაზის გაუმჯობესებასა და ინტერმუნიციპალური თანამშრომლობის ხელშეწყობის ახალ მექანიზმებს.
როგორც შეხვედრაზე აღინიშნა, ადგილობრივ თვითმმართველობათა ეროვნული ასოციაცია ზრუნავს ინტერმუნიციპალური თანამშრომლობის განვითარებაზე და ამ მიზნით გაეროს განვითარების პროგრამის (UNDP) მხარდაჭერით ექსპერტებთან აქტიური თანამშრომლობით მომზადდა საკანონმდებლო ცვლილებათა პროექტის სრული პაკეტი. ექსპერტის განმარტებით, კონფერენციაზე აღნიშნული თემის შესახებ პანელური დისკუსიაც სწორედ ამ მიზანს ემსახურებოდა.