საერთაშორისო პროექტის — “EcoYOU: ეკოლოგიურად სუფთა და მწვანე აზროვნება ეკომეგობრული ქცევისათვის” — ფარგლებში, 16-19 ივნისს მოლდოვასა და რუმინეთის რესპუბლიკებში გარემოსდაცვითი აქტივობები განხორციელდა.
ღონისძიებებში, ადგილობრივებთან ერთად, ჩართულნი იყვნენ საქართველოს ადგილობრივ თვითმმართველობათა ეროვნული ასოციაციის (ა.თ.ე.ა) წარმომადგენლები და დარგის ექსპერტები.
მოლდოვაში, 16-18 ივნისს, მოეწყო დისკუსიები ბიომრავალფეროვნებასა და ეკოლოგიურად პასუხისმგებელ ქცევებზე, გაიმართა ტრენინგი ეკო-ბანაკის მოწყობის თემაზე. მონაწილეები ასევე აქტიურად ჩაერთნენ ფოკუს ჯგუფებში, სადაც განიხილეს მნიშვნელოვანი გარემოსდაცვითი საკითხები და გამოიკვლიეს პრობლემების შესაძლო გადაწყვეტის გზები. პარალელურად, მოეწყო ერთობლივი ბანაკი, რომლის ფარგლებშიც მოხდა ცოდნისა და პრაქტიკული გამოცდილების გაცვლა.
აქტივობები 18-19 ივნისს რუმინეთში გაგრძელდა, სადაც ანალოგიური ღონისძიებები განხორციელდა, მათ შორის იყო დასუფთავების აქცია, რომელიც საზოგადოებრივი ჩართულობის წახალისებას ემსახურებოდა.
ორივე ქვეყანაში მნიშვნელოვანი ადგილი დაეთმო შეხვედრებს თემაზე — „8 ზეგანაკვეთური საათი ეკოლოგიურად დადებითი ზემოქმედებისთვის“. მონაწილეებმა მოისმინეს გარემოს დაცვის სფეროში მოღვაწე პროფესიონალების გამოცდილება და იმუშავეს ფოკუს ჯგუფებში, სადაც ახალგაზრდებს საშუალება ჰქონდათ გამოეხატათ ხედვები ადგილობრივი ეკოლოგიური გამოწვევებისა და მათი გადაჭრის ინოვაციური გზების შესახებ.
ღონისძიებებში საქართველოდან მონაწილეობდნენ: ა.თ.ე.ა-ს აღმასრულებელი დირექტორის მოადგილე და პროექტის მენეჯერი – ტატიანა ბოკუჩავა, ასოციაციის საერთაშორისო პროექტების განვითარების მენეჯერი და პროექტის ასისტენტი – მარიამ ჯინჭარაძე, ახალგაზრდა მკვლევართა და ანალიტიკოსთა გაერთიანების პრეზიდენტი – სოსო მეზვრიშვილი და ეკოტოქსიკოლოგი – ხათუნა ახალია.
მნიშვნელოვანია, რომ მოლდოვასა და რუმინეთში ჩატარებულ ღონისძიებებს წინ უძღოდა ანალოგიური აქტივობები საქართველოში, რაც პროექტის ეტაპობრივად განხორციელების ფარგლებში განხორციელდა.
პროექტს, რომელიც შავი ზღვის აუზის პროგრამის (Interreg VI-B NEXT Black Sea Basin Programme) ფარგლებში ევროკავშირის თანადაფინანსებით მიმდინარეობს, საქართველოში ადგილობრივ თვითმმართველობათა ეროვნული ასოციაცია (ათეა) უწევს კოორდინირებას. აღნიშნული პროექტი ასევე ხორციელდება მოლდოვისა და რუმინეთის რესპუბლიკებში და მას ადგილობრივი ასოციაციები: ტრანსსასაზღვრო თანამშრომლობისა და ევროპასთან ინტეგრაციის სააგენტო( მოლდოვა ); ასოციაცია პრო ნატურა (გალაცი) და არასამთავრობო ორგანიზაცია, მარე ნოსტრუმ ეკოლოგი (კონსტანცა) მართავენ.
„EcoYOU’’-ს მიზანია ტრანსნაციონალური თანამშრომლობის გაძლიერება გარემოსდაცვით ორგანიზაციებს, საგანმანათლებლო დაწესებულებებს, საჯარო სტრუქტურებსა და ახალგაზრდულ ჯგუფებს შორის. განსაკუთრებული ყურადღება გამახვილებულია მიკროპლასტმასით დაბინძურების შემცირებაზე და მდგრადი გარემოსდაცვითი პრაქტიკის დანერგვაზე შავი ზღვის აუზის ქვეყნებში.