საქართველოს ადგილობრივ თვითმმართველობათა ეროვნული ასოციაციის (ა.თ.ე.ა) სამართლებრივ საკითხთა კომიტეტისა და საქართველოს პარლამენტის რეგიონული პოლიტიკის და თვითმმართველობის კომიტეტის წევრებს შორის შეხვედრა გაიმართა.
გაცნობითი ხასიათის შეხვედრის მიზანს წარმოადგენდა მუნიციპალიტეტების ინტერესების დაცვის მიმართულებით ხელსაყრელი და ეფექტიანი თანამშრომლობის ფორმატის განსაზღვრა.
შეხვედრაზე განსაკუთრებული ყურადღება გამახვილდა მწვავე სფეროებზე, რომელთა მოგვარებაც აღნიშნული პლატფორმის დაფუძნებით, ადგილობრივ თვითმმართველობებსა და საკანონმდებლო ორგანოს შორის მჭიდრო და მუდმივი კომუნიკაციის საფუძველზე იქნება შესაძლებელი.
შეხვედრის შედეგად გამოვლინდა სამომავლო თანამშრომლობის ძირითადი მიმართულებები, რომლებიც ა.თ.ე.ა-ს მხრიდან საკანონმდებლო წინადადებების მიწოდებას, პარლამენტის კომიტეტისგან კი, მუნიციპალიტეტებისთვის მნიშვნელოვანი კანონებისა თუ პროექტების გაზიარებას გულისხმობს.
აღსანიშნავია, რომ ა.თ.ე.ა-მ სამართლებრივ საკითხთა კომიტეტი მიმდინარე წლის 19 თებერვალს დააფუძნა.
კომიტეტის მიზანია ადგილობრივი თვითმმართველობის საკითხებში აქტიური ჩართულობა და მუნიციპალიტეტების ინტერესების დაცვა. კომიტეტი უზრუნველყოფს სახელმწიფო ხელისუფლების ორგანოების მიერ მომზადებული სამართლებრივი აქტების განხილვას, მათ შეფასებას და საჭიროების შემთხვევაში შესაბამისი რეკომენდაციებისა და შენიშვნების წარდგენას.
კომიტეტი ასევე იმუშავებს საკანონმდებლო წინადადებებზე და კანონქვემდებარე აქტების პროექტებზე, რომლებიც ხელს შეუწყობს თვითმმართველობის განვითარებას და დეცენტრალიზაციის პროცესს.