საქართველოს ადგილობრივ თვითმმართველობათა ეროვნულმა ასოციაციამ (ა.თ.ე.ა) და გაერთიანებული ქალაქებისა და ადგილობრივი თვითმმართველობების აზია-წყნარი ოკეანის ორგანიზაციამ (UCLG ASPAC) ხელი მოაწერეს თანამშრომლობის შესახებ მემორანდუმს, რომლის მიზანია ასოციაციებს შორის პარტნიორობის გაღრმავება და პრაქტიკული თანამშრომლობის განვითარება.
ხელმოწერის ცერემონია 2025 წლის 21 მაისს ონლაინ რეჟიმში გაიმართა. დოკუმენტს ხელი მოაწერეს ა.თ.ე.ა.-ს აღმასრულებელმა დირექტორმა ნინო რუხაძემ და UCLG ASPAC -ის გენერალურმა მდივანმა ბერნადია ირავატი ჩანდრადევიმ.
მემორანდუმი მოიცავს თანამშრომლობას ისეთ სფეროებში როგორებიცაა: ცოდნისა და გამოცდილების გაზიარება, შესაძლებლობების გაძლიერება და წარმატებული პრაქტიკის გაცვლა; გაძლიერებული რეგიონული და გლობალური თანამშრომლობა; ერთობლივი პროექტების განვითარება და მათი შესაძლო დაფინანსების მოძიება, ასევე კულტურული და ინსტიტუციური გაცვლის ხელშეწყობა.
შეთანხმება მიმართულია ორმხრივი თანამშრომლობის განვითარებაზე, როგორც რეგიონულ, ასევე საერთაშორისო დონეზე, რაც ადგილობრივ თვითმმართველობებს შესაძლებლობას მისცემს აქტიურად ჩაერთონ საერთაშორისო თანამშრომლობის პროცესებში.
მხარეები ადასტურებენ, რომ პარტნიორობა ეფუძნება თანასწორობისა და ურთიერთპატივისცემის პრინციპებს.
როგორც ა.თ.ე.ა-ს აღმასრულებელმა დირექტორმა ნინო რუხაძემ განაცხადა, ასოციაციისთვის აღნიშნული მემორანდუმი წარმოადგენს მნიშვნელოვან ეტაპს საერთაშორისო თანამეგობრობაში ადგილობრივი თვითმმართველობების ინტეგრაციისა და მათი შესაძლებლობების გაფართოების კუთხით. ორგანიზაცია აქტიურად აგრძელებს თანამშრომლობის ქსელის გაფართოებას და წევრებისთვის საერთაშორისო გამოცდილების გაზიარების ხელშეწყობას.