ადგილობრივ დონეზე ახალგაზრდული პოლიტიკის მართვის სისტემის გაუმჯობესების ხელშეწყობის მიზნით, საქართველოს ადგილობრივ თვითმმართველობათა ეროვნულ ასოციაციასა (ა.თ.ე.ა) და სსიპ ახალგაზრდობის სააგენტოს შორის თანამშრომლობის მემორანდუმი გაფორმდა.
დოკუმენტს ხელი მოაწერეს ა.თ.ე.ა-ს აღმასრულებელმა დირექტორმა – ნინო რუხაძემ და ახალგაზრდობის სააგენტოს ხელმძღვანელის მოვალეობის შემსრულებელმა – ვახტანგ ბააკაშვილმა.
მემორანდუმის ძირითადი მიზანია ახალგაზრდებისთვის შეიქმნას ხელშემწყობი გარემო და ახალი შესაძლებლობები, რომლებიც მათ დემოკრატიულ და საზოგადოებრივ პროცესებში აქტიურ მონაწილეობას შეუწყობს ხელს. დოკუმენტში განსაკუთრებული აქცენტი კეთდება მუნიციპალიტეტებში ახალგაზრდულ საკითხებზე მომუშავე საჯარო მოხელეთა კვალიფიკაციის ამაღლებაზე, ახალგაზრდების ინფორმირებულობისა და ჩართულობის მექანიზმების განვითარებაზე.
მემორანდუმი, ასევე ითვალისწინებს ადგილობრივი თვითმმართველობების საჭიროებების შეფასებას, რესურსების მიზნობრივ გამოყენებასა და სხვადასხვა მუნიციპალიტეტში არსებული წარმატებული პრაქტიკის გაზიარებას. დოკუმენტის საფუძველზე, მხარეები ერთობლივად განახორციელებენ ღონისძიებებს, რომლებიც მიზნად ისახავს ადგილობრივ დონეზე ახალგაზრდული პოლიტიკის მართვის სისტემის გაუმჯობესებას. დაიგეგმება სპეციალური პროგრამები, ტრენინგები და სხვა ტიპის ინიციატივები, რომლებიც გააძლიერებს იმ ადამიანების ცოდნასა და უნარებს, ვინც მუნიციპალიტეტებში ახალგაზრდულ მიმართულებაზე მუშაობს.
განსაკუთრებული ყურადღება დაეთმობა კომუნიკაციას. შეთანხმების თანახმად, მხარეები უზრუნველყოფენ ერთობლივ პროექტებთან დაკავშირებული ინფორმაციის აქტიურ გავრცელებას, როგორც სოციალურ ქსელებში, ისე სხვა ონლაინ პლატფორმებზე, რაც უზრუნველყოფს ახალგაზრდების დროულად და სრულად ინფორმირებას იმ შესაძლებლობებზე, რომლებიც მათთვის იქმნება.
დოკუმენტის თანახმად მხარეებს შესაძლებლობა ექნებათ მემორანდუმში შეთანხმებით განახორციელონ საჭირო ცვლილებები.