პროექტის „EcoYOU: ეკოლოგიურად სუფთა და მწვანე აზროვნება ეკომეგობრული ქცევისათვის“ ფარგლებში, საქართველოს ადგილობრივ თვითმმართველობათა ეროვნული ასოციაცია (ათეა) 6-7 თებერვალს გამართავს სემინარებს გორის, კასპის, ბოლნისისა და დმანისის მუნიციპალიტეტების მერიებისა და საკრებულოების გარემოსდაცვით საკითხებზე მომუშავე თანამშრომლებისთვის.
სესიებზე მონაწილეებს შესაძლებლობა ექნებათ დეტალური ინფორმაცია მიიღონ გარემოს დაცვის სამეცნიერო, სოციალური და ეკონომიკური ასპექტების შესახებ. განსაკუთრებული ყურადღება გამახვილდება ისეთ გამოწვევებზე როგორებიცაა: ხმელეთის და წყლის ეკოსისტემის დაბინძურება, ნარჩენების მართვა, მდგრადი განვითარების მიდგომების დანერგვა და სოფლის მეურნეობაში მიღებული ტრადიციული პრაქტიკების არაეფექტურობა.
შეხვედრების ბოლოს მოეწყობა დისკუსები, სადაც მონაწილეები იმსჯელებენ ადგილობრივ დონეზე არსებულ გამოწვევებთან გამკლავების გზებზე.
პროექტი ხელს უწყობს ტრანსნაციონალურ თანამშრომლობას გარემოსდაცვით არასამთავრობო ორგანიზაციებს, საგანმანათლებლო დაწესებულებებს, საჯარო მოხელეებსა და ახალგაზრდულ ჯგუფებს შორის, რაც მნიშვნელოვნად გაზრდის მოქალაქეთა ცნობიერების ამაღლების აქტივობების ეფექტურობას.
სემინარებს დმანისსა და ბოლნისში გარემოს დაცვის ექსპერტი, ხათუნა ახალაია გაუძღვება, გორისა და კასპის მუნიციპალიტეტებში გამართული სემინარებს კი, ტრენერი გარემოს დაცვის მიმართულებით, სოსო მეზვრიშვილი ჩაატარებს.
აღსანიშნავია, რომ პროექტს, რომელიც ევროკავშირის თანადაფინანსებით შავი ზღვის აუზის პროგრამის Interreg NEXT-ის ფარგლებში მიმდინარეობს, საქართველოში ადგილობრივ თვითმმართველობათა ეროვნული ასოციაცია (ათეა) ახორციელებს.
პროექტის მიზანია თემებისა და ადგილობრივი ხელისუფლების ორგანოების ჩართულობის დონის გაზრდა გარემოს დაცვის აქტივობებში.