2-6 ივნისს საქართველოს ადგილობრივ თვითმმართველობათა ეროვნული ასოციაცია (ა.თ.ე.ა) მასპინძლობს  პროექტის „EcoYOU: ეკოლოგიურად სუფთა და მწვანე აზროვნება ეკომეგობრული ქცევისათვის“ პარტნიორებს რუმინეთიდან და მოლდოვიდან.

ვიზიტის ფარგლებში დაგეგმილია სხვადასხვა ღონისძიებები, რომლებიც პროექტის სპეციფიკიდან გამომდინარე, გორის მუნიციპალიტეტში, ტანისა და თეძმის დაცულ ტერიტორიაზე, სასტუმროში ,,Solo Grand Boshuri Hotel” მოეწყობა.

ღონისძიების მიზანია გარემოსდაცვითი ცნობიერების ამაღლება, ეკომეგობრული პრაქტიკის ხელშეწყობა და ახალგაზრდებისა და ადგილობრივი თემების ჩართულობის გაძლიერება.

სტუმრებთან ერთად აქტივობებში ჩაერთვებიან ა.თ.ე.ა-ს წარმომადგენლები,  ადგილობრივი ახალგაზრდები, არასამთავრობო ორგანიზაციები, გორის მუნიციპალიტეტის მერიისა და საკრებულოს თანამშრომლები, მასწავლებლები და თემით დაინტერესებული სხვა პირები.

ხუთდღიანი პროგრამა მოიცავს, როგორც თეორიულ, ისე პრაქტიკულ ნაწილს – მათ შორის ბიომრავალფეროვნებაზე და ეკოლოგიურად პასუხისმგებელ ქცევებზე ორიენტირებულ დისკუსიებს, ეკო-ბანაკის მოწყობის ტრენინგს, ფოკუს ჯგუფების მუშაობას და ერთობლივ ბანაკს. მონაწილეები გაიზიარებენ საგანმანათლებლო და ინსპირაციულ გამოცდილებას, რომლის მიზანია გარემოსდაცვითი ცნობიერების ამაღლება და მდგრადი პრაქტიკის დანერგვა.  განსაკუთრებული ყურადღება დაეთმობა ნარჩენების მართვას, ბუნებრივ გარემოზე ზემოქმედების მინიმიზაციას და მდგრადი მასალების გამოყენებას.

დღის წესრიგი ასევე მოიცავს  დასუფთავების აქციას, სადაც ახალგაზრდები აქტიურად მიიღებენ მონაწილეობას, ღონისძიების ბოლოს კი გაიმართება  შეხვედრა სახელწოდებით „8 ზეგანაკვეთური საათი ეკოლოგიურად დადებითი ზემოქმედებისთვის“. აღნიშნული  აქტივობა მოიცავს მოხალისეთა ჯგუფების პროფესიული გამოცდილების გაზიარებას არასამუშაო საათებში. ჯგუფები დაკომპლექტებული იქნება სხვადასხვა სფეროს სპეციალისტებით, მათ შორის მარკეტინგის, კომუნიკაციის, გაყიდვების, იურიდიული, IT, განათლების, გარემოს დაცვის, მენეჯმენტის და სხვა პროფესიონალებით.  პარალელურად გაიმართება ფოკუს ჯგუფის დისკუსიაც.

აღსანიშნავია, რომ პროექტს, რომელიც შავი ზღვის აუზის პროგრამის (Interreg VI-B) NEXT Black Sea Basin Programme) ფარგლებში, ევროკავშირის თანადაფინანსებით მიმდინარეობს, საქართველოში ადგილობრივ თვითმმართველობათა ეროვნული ასოციაცია (ა.თ.ე.ა) ახორციელებს.

პროექტის მიზანია  თემებისა და ადგილობრივი ხელისუფლების ორგანოების ჩართულობის დონის გაზრდა გარემოს დაცვის აქტივობებში, განსაკუთრებით მდინარეების, ტბებისა და ზღვის სანაპიროებზე მიკროპლასტმასის რაოდენობის შემცირების ნაწილში.

პროექტი “EcoYOU” ითვალისწინებს ტრანსნაციონალურ  თანამშრომლობას გარემოსდაცვით არასამთავრობო ორგანიზაციებს, საგანმანათლებლო დაწესებულებებს, საჯარო მოხელეებსა და ახალგაზრდულ ჯგუფებს შორის. პროექტის მთავარი ამოცანაა საერთო რესურსების გამოყენებითა და გამოცდილებების გაზიარებით ეფექტურად გადაჭრას დაბინძურების პრობლემები.

აღნიშნული პროექტი ასევე ხორციელდება მოლდოვისა და რუმინეთის რესპუბლიკებში.