საქართველოს ადგილობრივ თვითმმართველობათა ეროვნულმა ასოციაციამ აღმასრულებელი საბჭოს რიგით LI სხდომა გამართა, რომელსაც ათეა-ს ვიცე-პრეზიდენტი – გიორგი ტყემალაძე უძღვებოდა.
დღის წესრიგის დამტკიცების შემდეგ სხდომის მონაწილეებმა ორგანიზაციის 2024 წლის ბიუჯეტის შესრულების და საქმიანობის შესახებ მოისმინეს ანგარიში და 2025 წლის ბიუჯეტის პროექტი განიხილეს.
ათეა-ს აღმასრულებელი დირექტორის, ნინო რუხაძის განმარტებით, ორგანიზაციის პრიორიტეტების გათვალისწინებით, ათეა-ს 2025 წლის ფინანსური დოკუმენტი ორიენტირებულია მუნიციპალიტეტების ინტერესების ადვოკატირების გაძლიერებაზე და 2024 წელს დაფუძნებული რეგიონული პლატფორმების, თემატური ჯგუფებისა და მუნიციპალიტეტების საექსპერტო/საკონსულტაციო მომსახურებაზე,
სხდომა დისკუსიის ფორმატში წარიმართა, სადაც მონაწილეებმა აღნიშნული სერვისების უმნიშვნელოვანეს როლზე ისაუბრეს. საბჭოს წევრების მიერ ასევე წამოყენებული იყო წინადადებები პლატფორმების თემატიკის გაფართოებასთან დაკავშირებით. როგორც ნინო რუხაძემ განაცხადა, აღნიშნულ ინიციატივებს ათეა დეტალურად განიხილავს და საჭიროებისამებრ ეტაპობრივად განახორციელებს.
დისკუსიის შემდეგ საბჭომ ერთხმად დაუჭირა მხარი ასოციაციის ბიუჯეტის პროექტს.
დღესვე დამტკიცდა საქართველოს ადგილობრივ თვითმმართველობათა ეროვნული ასოციაციის სამართლებრივ საკითხთა კომიტეტის დებულება,
აღსანიშნავია, რომ სამართლებრივ საკითხთა კომიტეტი აღნიშნული დებულების საფუძველზე შეიქმნება.
კომიტეტის ძირითად საქმიანობას წარმოადგენს სახელმწიფო ხელისუფლების ორგანოთა მიერ ადგილობრივი თვითმმართველობის საკითხებზე გადაწყვეტილების მიღების პროცესში მონაწილეობა, კონსულტაციების ჩატარება, თვითმმართველობის საკითხებთან დაკავშირებული საკანონმდებლო და კანონქვემდებარე აქტების პროექტებზე დასკვნებისა და შენიშვნების მომზადება და წარდგენა, აგრეთვე მუნიციპალიტეტების ინტერესების დაცვისა და დეცენტრალიზაციის პროცესის ხელშესაწყობად საკანონმდებლო და კანონქვემდებარე აქტების პროექტების მომზადება, მათი შესაბამის ორგანოებში წარდგენა და განხილვის პროცესში მონაწილეობა.
სხდომაზე აგრეთვე დამტკიცდა ათეა-ს საქმისწარმოების წესი და ასოციაციის შრომის შინაგანაწესი.
შეხვედრის დასასრულს აღმასრულებელ საბჭოს წევრებს ასევე მიეწოდათ ინფორმაცია ასოციაციაში სექსუალური შევიწროების მექანიზმის დანერგვის შესახებ.
შეხვედრაში, რომელიც ონლაინ ფორმატში მიმდინარეობდა ათეა-ს აღმასრულებელი დირექტორის მოადგილე, ლაშა არჩვაძე და ასოციაციის ფინანსური მენეჯერი, რუსუდან ჩაგელიშვილი იყვნენ ჩართულნი.