8 ივლისს, მარნეულის კოლეჯში „მოდუსი“, საქართველოს ადგილობრივ თვითმმართველობათა ეროვნული ასოციაციის (ა.თ.ე.ა.) ორგანიზებით გაიმართა ბანაკი „თესლის მცველები“. ღონისძიება ჩატარდა პროექტის – „SEEDGUARD: აგრო თესლების მცველები ბიომრავალფეროვნებისთვის, აგრობიომრავალფეროვნებისთვის, ეკოსისტემური სერვისებისთვის და კლიმატის ადაპტაციისთვის“ (BSB00450 SEEDGUARD) ფარგლებში და მიზნად ისახავდა ტრადიციული ქართული ბოსტნეულის თესლების დაცვისა და პოპულარიზაციის ხელშეწყობას.
ბანაკში მონაწილეობდნენ ადგილობრივი ფერმერები, თესლის მოყვარული მწარმოებლები და ახალგაზრდები პროექტის საპილოტე რეგიონებიდან, ასევე კოლეჯის”მოდუსი” მებოსტნეობის პროგრამის აკადემიური პერსონალი და ადგილობრივი თითმმართველობის წარმომადგენლები.
შეხვედრა მოიცავდა ჯგუფურ დისკუსიას, სადაც განხილული იყო თემის თესლის კოლექციების (CSC) კონცეფცია, მათი მნიშვნელობა, მიზანი და მუშობის პრინციპები.
მონაწილეები გაეცნენ ადგილობრივი თესლის წარმოების და კოლექციების საერთაშორისო პრაქტიკას და იმსჯელეს თესლის გაწმენდის, შენახვისა და გაცვლის მეთოდებზე.
ღონისძიებას უძღვებოდა პროექტის კოორდინატორი ნინო ზურაბიშვილი, რომლის ხელმძღვანელობითაც ჯგუფური მუშაობა პრაქტიკულ გამოცდილებაზე დაფუძნებული დიალოგით წარიმართა.
აქტივობები 9 ივლისსაც გაგრძელდება — მეორე დღე დაეთმობა სათბურებისა და ბოსტნეულის მწარმოებლების მონახულებას, სადაც დაგეგმილია მსჯელობა თესლის მიწოდების, შეძენისა და გაცვლის ფინანსურ და საკანონმდებლო ასპექტებზე.
პროექტი SEEDGUARD მიზნად ისახავს ბოსტნეულის ტრადიციული ჯიშებისა და სახეობების თესლის დაცვას, აგრობიომრავალფეროვნებისა და სასურსათო უსაფრთხოების უზრუნველყოფას, ასევე ჯანსაღი საკვების მრავალფეროვნების და ეკოსისტემური სერვისების გაუმჯობესებას. ინიციატივა ითვალისწინებს თემის მონაწილეობის საფუძველზე თესლის კოლექციების და ბანკების შექმნას, რაც მნიშვნელოვნად გააუმჯობესებს ბოსტნეულის მწარმოებლების ხელმისაწვდომობას ტრადიციულ თესლზე.
პროექტი ხორციელდება ა.თ.ე.ა.-ს მიერ, ევროკავშირის თანადაფინანსებით, შავი ზღვის აუზის პროგრამის ფარგლებში.
# SEEDGUARD