ათეა-მ ევროკავშირის პროექტის (N4ED) ფარგლებში სამუშაო შეხვედრა გამართა

1 ნოემბერი

საქართველოს ადგილობრივ თვითმმართველობათა ეროვნული ასოციაციის (NALAG) ორგანიზებით, პროექტის „ეფექტიანობის და განვითარების ქსელი“ (N4ED) ფარგლებში შეხვედრა გაიმართა, რომელშიც ათეა-ს აღმასრულებელი დირექტორის მოადგილესთან - ნათია ღვინაშვილთან და ასოციაციის ექპერტებთან - ნინო ზურაბიშვილთან და კახა გურგენიძესთან ერთად,  საქართველოში ევროპის კავშირის რეგიონების კომიტეტის წევრი - ანდრის იაუნსლეინისი და ევროკავშირის ექსპერტი, ლატვიის ადგილობრივი და რეგიონული მმართველობების უფროსი მრჩეველი- მარის ფუკისი, ასევე საქართველოს მუნიციპალიტეტებისა და LAG-ების წარმომადგენლები იღებდნენ მონაწილეობას.


შეხვედრაზე, რომელიც ბორჯომის მუნიციპალიტეტებში გაიმართა, მხარეებმა რეგიონებში მონაწილეობითი პოლიტიკის შემუშავებასა და დანერგვაზე, ამ მიმართულებით გასატარებელ ღონისძიებებზე, ასევე, აღნიშნული კუთხით არსებულ ევროპულ გამოცდილებაზე, თემზე დაფუძნებული ადგილობრივი განვითარების (CLLD) მეთოდოლოგიის საქართველოში დანერგვის გზებსა და CLLD პროცესის ორგანიზების შესახებ ისაუბრეს.

შეხვედრის მონაწილეებმა ასევე ,,LEADER“  მეთოდოლოგიაც განიხილეს და იმ ინსტრუმენტებზე გაამახვილეს ყურადღება, რომლებიც  სასოფლო-სამეურნეო მიმართულებების განვითარების საკითხებთან დაკავშირებული გადაწყვეტილებების უფრო ეფექტიანად მიღებას უწყობს ხელს.
 
კახა გურგენიძემ და ნინო ზურაბიშვილმა დამსწრე საზოგადოებას მოქალაქეთა ჩართულობის მიმართულებით პრეზენტაციები წარუდგინეს და დეტალურად ისაუბრეს საკანონმდებლო ინიციატივებზე.  

თავის მხრივ, სამუშაო შეხვედრაზე პრეზენტაციები წარადგინეს ლაგოდეხის მუნიციპალიტეტის  LAG-ის წარმომადგენელმა - სალომე ღონღაძემ და ,, ფიფლ ინ ნიდ“- ისა და ,,RDFG-ის სოფლის განვითარების“ პროექტების მენეჯერებმა ნინო მარკოზაშვილმა და ნელი რევაზიშვილმა.

ლატვიელი ექსპერტები - ანდრის იაუნსლეინისი და მარის ფუკისი საქართველოს სამუშაო ვიზიტით 30 ოქტომბერს ეწვივნენ და საქართველოს რეგიონული განვითარებისა და ინფრასტრუქტურის სამინისტროს წარმომადგენლებს შეხვდნენ.

ლატვიელ სტუმრებს, ათეა-ს ექსპერტებთან ერთად,  საქართველოს რეგიონული განვითარებისა და ინფრასტრუქტურის მინისტრის მოადგილემ - მზია გიორგობიანმა და ამავე სამინისტროს ადგილობრივი თვითმმართველობის განვითარებისა და პოლიტიკის დეპარტამენტის უფროსმა - ნიკოლოზ როსებაშვილმა უმასპინძლეს.

მზია გიორგობიანმა სტუმრებს ადგილობრივი და რეგიონული განვითარების მიმართულებით ქვეყანაში მიმდინარე პროექტების შესახებ მიაწოდა ინფორმაცია და მათი განხორციელების პროცესში სამინისტროს ჩართულობასა და მხარდაჭერას გაუსვა ხაზი.

შეხვედრაზე, ლატვიელმა ექსპერტებმა მონაწილეობითი მართვის მიმართულებით ლატვიური გამოცდილებაც მიმოიხილეს. სტუმრებმა ისეთ საკითხებს გაუსვეს ხაზი, როგორებიცაა: ადგილობრივი და რეგიონული განვითარება ევროკავშირში, ევროკავშირის რურალური განვითარების პოლიტიკა, თემზე დაფუძნებული ადგილობრივი განვითარება და ადგილობრივი აქტიური ჯგუფების (LAG - Local Activity Group) მნიშვნელობა.

როგორც სტუმრებმა  აღნიშნეს, ადგილობრივი ჯგუფების გასააქტიურებლად და მასში ჩართული მონაწილეების ნდობის მოსაპოვებლად, საჭიროა პერმანენტული ღონისძიებების ეტაპობრივად გატარება, რაც თავის თავად, წარმატების საწინდარია. მითივე თქმით, ამ პროცესში  უმნიშვნელოვანესია ევროპული გამოცდილების გაზიარება, რომელზე დაყრდნობითაც, საქართველო აუცილებლად შეძლებს საკუთარი ნიშის დამკვიდრებას.

ლატვიელმა ექსპერტებმა სამუშაო ვიზიტის ფარგლებში, ასევე, ქუთაისის მერთან- გიორგი ჭიღვარიასთან და მის მოადგილესთან - ნინო  თვალთვაძესთანაც გამართეს შეხვედრა, სადაც ქართულმა მხარემ სტუმრებს პრეზენტაციის სახით,  საკუთარ მუნიციპალიტეტში მიმდინარე პროექტების შესახებ მიაწოდეს ინფორმაცია. მხარეებმა, ასევე,  თემზე დაფუძნებული ადგილობრივი განვითარების პერსპექტივებზე, მათი პრაქტიკაში დანერგვის გზებსა და სტრატეგიაზე იმსჯელეს და აღნიშნულ საკითხებთან დაკავშირებით, ერთმანეთს გამოცდილება გაუზიარეს.